មន្ត្រីនគរបាលខេត្តព្រះសីហនុ បានឲ្យដឹងថា ទូររថភ្លើងដឹកអ្នកដំណើរមួយខ្សែ បានរត់ធ្លាក់ចេញពីផ្លូវដែក បន្ទាប់ពីបានបុកគ្នាជាមួយរថយន្តដឹកដីមួយគ្រឿងនៅឯស្រុកព្រៃនប់ នៅព្រឹកថ្ងៃនេះ ប៉ុន្តែ គ្មានអ្នកដំណើរណាម្នាក់រងគ្រោះថ្នាក់នោះឡើយ។
អធិការនគរបាលស្រុកព្រៃនប់ លោក ហូរ យ៉ៃ បានប្រាប់វីអូឌីតាមទូរស័ព្ទថា ទូររថភ្លើងមួយខ្សែដែលស្ថិតក្នុងទិសដៅពីខេត្តព្រះសីហនុមកកាន់រាជធានីភ្នំពេញ បានធ្លាក់ចេញពីផ្លូវ ក្រោយពីបុកគ្នាជាមួយរថយន្តដឹកដីមួយគ្រឿង នៅភូមិព្រែកទាល់ ឃុំទឹកថ្លា នៅព្រឹកថ្ងៃចន្ទនេះ។
មន្ត្រីនគរបាលរូបនេះ បានឲ្យដឹងទៀតថា គ្រោះថ្នាក់មួយនេះ បណ្ដាលមកពីរថយន្តដឹកដីបើកបរឆ្លងកាត់ផ្លូវដែក ខណៈដែលគ្មានស្លាកសញ្ញាសម្គាល់ និងរនាំងបាំងការឆ្លងកាត់នោះឡើយ។
ករណីរថភ្លើងបុកជាមូយរថយន្តដឹកដីដែរនៅក្នុងខេត្តបន្ទាយមានជ័យកាលពីថ្ងៃទី៣១ ខែមករា ឆ្នាំ២០១៩៕
