លោក នីកូឡាស ម៉ាឌូរ៉ូ មេដឹកនាំវេណេស៊ុយអេឡាបានប្រកាសថា រដ្ឋាភិបាលរបស់លោកនឹងចំណាយថវិកាបន្ថែមសម្រាប់ការទិញសព្វាវុធបំពាក់ឲ្យក្រុមយោធា ដោយថាដើម្បីការពារសន្តិភាពក្នុងប្រទេស។
លោក ម៉ាឌូរ៉ូ បានថ្លែងបែបនេះក្នុងពេលដែលលោកបើកពិធីសមយុទ្ធយោធាដ៏ធំរបស់កងទ័ពវេណេស៊ុយអេឡាកាលពីថ្ងៃអាទិត្យ។
សារព័ត៌មាន Sputnik News បានចុះផ្សាយថា លោក ម៉ាឌូរ៉ូ បានធ្វើការប្តេជ្ញាថា នឹងបំពាក់អាវុធទំនើបៗឲ្យក្រុមយោធា។ លោក ថានឹងទិញបន្ថែមទៀតនូវមីស៊ីលដែលបាញ់ដោយដៃរហូតដល់មីស៊ីលទំនើបៗ។
លោក ក៏បានសង្កត់ធ្ងន់ផងដែរថា កងទ័ពវេណេស៊ុយអេឡាត្រៀមខ្លួនរួចហើយក្នុងការបូជាជីវិតដើម្បីជាតិ។ លោក បន្ថែមថា វេណេស៊ុយអេឡាជាប្រទេសដែលមានសន្តិភាព ហើយក៏មិនចង់បង្កជំលោះជាមួយប្រទេសណាមួយដែរ។ ប៉ុន្តែ លោកបានព្រមានប្រទេសដទៃផងដែរថា កុំរករឿងឈ្លោះ និងគំរាមវេណេស៊ុយអេឡាឲ្យសោះ។
សព្វាវុធភាគច្រើនរបស់វេណេស៊ុយអេឡានាំចូលមកពីរុស្ស៊ី។ កិច្ចព្រមព្រៀងក្នុងការទិញអាវុធពីរុស្ស៊ី ធ្វើឡើងតាំងពីមុនពេលវេណេស៊ុយអេឡាជួបវិបត្តិនយោបាយ។ ទោះយ៉ាងណា លោក ម៉ាឌូរ៉ូ បានបញ្ជាក់ប្រាប់សារព័ត៌មាន Sputnik News ថារដ្ឋាភិបាលក្រុងការ៉ាកាស (Caracas) នៅតែគ្រោងទិញអាវុធទំនើបៗពីរុស្ស៊ីដដែល។
ក្រុមយោធាវេណេស៊ុយឡាកំពុងធ្វើសមយុទ្ធយោធាទ្រង់ទ្រាយធំមួយក្នុងប្រវត្តិសាស្រ្តចាប់ពីថ្ងៃទី១០ ដល់១៥ ខែកុម្ភៈនេះ។ ការធ្វើសមយុទ្ធនេះ ត្រូវបានជឿថា ជាការបង្ហាញសាច់ដុំដាក់ក្រុម លោក Juan Guaido ដែលបានប្រកាសខ្លួនជាប្រធានាធិបតីប្រទេសនេះកាលពីថ្ងៃទី២៣ ខែមករា កន្លងទៅ។ វាក៏អាចជាយុទ្ធសាស្រ្តដែលលោក ម៉ាឌូរ៉ូ ធ្វើឡើងដើម្បីបង្ហាញថា កងទ័ពដ៏ច្រើននៅតែស្មោះស្ម័គ្រជាមួយលោក ហើយជាសារប្រាប់ដល់ប្រទេសដទៃដែលចង់ជ្រៀតជ្រែកកិច្ចផ្ទៃក្នុងវេណេស៊ុយអេឡាផងដែរ ថាប្រទេសនេះបានសមត្ថភាពគ្រប់គ្រាន់ក្នុងការពារខ្លួនទប់ទល់នឹងការវាយប្រហារណាមួយ។
លោក Juan Guaido ដែលបានប្រកាសខ្លួនជាប្រធានាធិបតីបណ្ដោះអាសន្នវេណេស៊ុយអេឡា កាលពីសប្តាហ៍មុន បានឲ្យដឹងថា លោកត្រៀមខ្លួនរួចហើយក្នុងការទទួលយកអន្តរាគមន៍ផ្នែកយោធារបស់អាមេរិក ដើម្បីទម្លាក់លោក ម៉ាឌូរ៉ូ ចេញពីតំណែង និងបញ្ចប់វិបត្តិនៅក្នុងប្រទេសវេណេស៊ុយអេឡា។
ប្រធានាធិបតីអាមេិក លោក ដូណាល់ ត្រាំ ក៏ធ្លាប់ប្រកាសផងដែរថា អន្តរាគមន៍យោធានៅវេណេស៊ុយអេឡាអាចនឹងកើតមានប្រសិនបើលោក ម៉ាឌូរ៉ូ មិនចុះចេញពីតំណែងនោះទេ៕