នាយករដ្ឋមន្ត្រីវៀតណាមបានហៅការជ្រើសរើសរបស់មេដឹកនាំអាមេរិកនិងមេដឹកនាំកូរ៉េខាងជើងក្នុងការសម្រេចយកវៀតណាមធ្វើជាកន្លែងជួបគ្នាជាលើកទី២ នេះជាសញ្ញាល្អទាក់ទាញអ្នកវិនិយោគ។
កាលពីសប្តាហ៍មុន លោក ដូណាល់ ត្រាំ បានប្រកាសថា ការជួបគ្នាជាមួយលោក គីម ជុងអ៊ុន ជាលើកទី២ នឹងធ្វើឡើងនៅក្នុងប្រទេសវៀតណាម គឺចាប់ផ្តើមពីថ្ងៃទី២៧ ដល់ថ្ងៃទី២៨ ខែកុម្ភៈឆ្នាំ២០១៩។ ជំនួបនេះធ្វើឡើងដើម្បីតាមដានលទ្ធផលនៃការអនុវត្តកិច្ចព្រមព្រៀងដែលបានធ្វើឡើងក្នុងជំនួបលើកទី១ កាលពីថ្ងៃទី១២ ខែមិថុនា ឆ្នាំ២០១៨ នៅក្នុងប្រទេសសិង្ហបុរី។
នាយករដ្ឋមន្ត្រីវៀតណាមថ្លែងប្រាប់មន្ត្រីរដ្ឋាភិបាលនៅអគារទីផ្សារភាគហ៊ុនក្នុងទីក្រុងហាណូយកាលពីម្សិលមិញថា ព្រឹត្តិការណ៍ជំនួបរវាងមេដឹកនាំអាមេរិក និងមេដឹកនាំកូរ៉េខាងជើងនេះជាសញ្ញាល្អប្រាប់ទៅអ្នកវិនិយោគថា វៀតណាមមានសុវត្ថិភាពអាចជឿទុកចិត្តបាន។
លោកបន្តថា វៀតណាមនឹងបំពេញការងារជាអន្តរជាតិ ហើយកេរ្តិ៍ឈ្មោះវៀតណាមកាន់តែលេចធ្លោឡើងថែមទៀត។
ដើម្បីឲ្យការរៀបចំកិច្ចប្រជុំនេះឲ្យកាន់តែល្អ រដ្ឋមន្ត្រីការបរទេសវៀតណាម លោក Pham Binh Minh បំពេញទស្សនកិច្ចនៅកូរ៉េខាងជើងពីថ្ងៃទី១២ ដល់ថ្ងៃទី១៤ ខែកុម្ភៈ ដើម្បីពិនិត្យលើកិច្ចការមួយចំនួន។
កាលពីចុងឆ្នាំ២០១៨ កូរ៉េខាងជើងក៏បានបញ្ជូនមន្ត្រីជាន់ខ្ពស់របស់ខ្លួនឲ្យរៀនសូត្រពីវៀតណាមក្នុងការធ្វើកំណែទម្រង់សេដ្ឋកិច្ច។ ការបញ្ជូនមន្ត្រីរបស់កូរ៉េខាងជើងនេះ ធ្វើឡើងតាមការណែនាំរបស់រដ្ឋមន្ត្រីការបរទេសអាមេរិក Mike Pompeo។