លោក ង្រ្វៀន សួនផុក ចេញបញ្ជាឲ្យមន្ត្រីនៅថ្នាក់មូលដ្ឋាន រួមជាមួយក្រសួងវប្បធម៌ ក្រសួងទេសចរណ៍ និងកីឡា ត្រូវធ្វើអធិការកិច្ចលើមន្ត្រីក្នុងឱកាសបុណ្យចូលឆ្នាំ ដើម្បីធានាដល់សុវត្ថិភាពពិតប្រាកដ និងការពេញចិត្តពីប្រជាពលរដ្ឋក៏ដូចជាភ្ញៀវទេសចរ។ នេះបើតាមសារព័ត៌មាន Vietnam News ចុះផ្សាយកាលពីម្សិលមិញ។
នាយករដ្ឋមន្ត្រីវៀតណាម បានចេញបញ្ជាឲ្យមន្ត្រីនៅថ្នាក់មូលសហការជាមួយក្រសួងពាក់ព័ន្ធដើម្បីត្រួតពិនិត្យទៅលើមន្ត្រីដែលដំឡើងថ្លៃសេវាផ្សេងៗ និងមន្ត្រីមានឥរិយាបថមិនល្អក្នុងការបម្រើពលរដ្ឋនៅថ្ងៃបុណ្យចូលឆ្នាំកាលពីសប្តាហ៍មុន។
ការត្រួតពិនិត្យលើការងារមន្ត្រីនេះគឺការដំឡើងថ្លៃសេវាជាចំណុចមួយដែលត្រូវយកចិត្តទុកដាក់ក្នុងចំណោមបញ្ហាផ្សេងៗទៀត។
នាយករដ្ឋមន្ត្រីរូបនេះបញ្ជាក់ថា មន្ត្រីដែលមានភារកិច្ចបំពេញការងារក្នុងថ្ងៃបុណ្យមិនអាចឈប់សម្រាកក្នុងម៉ោងដែលព្រមព្រៀងធ្វើការ គឺបំពេញការងារតាមម៉ោងរដ្ឋបាលនឹងមិនត្រូវពន្យារពេលក្នុងការបំពេញការងារដល់ក្រុមអ្នកផលិតទំនិញ និងក្រុមអ្នកវិនិយោគផ្សេងៗនោះឡើយ។ លោកបញ្ជាក់ថា បើរកឃើញមន្ត្រីណាប្រព្រឹត្តខុស នឹងត្រូវអនុវត្តទណ្ឌកម្មទៅតាមច្បាប់ដែលបានកំណត់។
នៅវៀតណាមក៏មានក្រុមការងារពិសេសតាមដាន និងការពារផលប្រយោជន៍សាធារណជន ចំពោះការដំឡើងថ្លៃទំនិញឬ សេវាខុសប្រក្រតី។