ក្រសួងមហាផ្ទៃបានធ្វើអត្តសញ្ញាណប័ណ្ណសញ្ជាតិខ្មែរគំរូថ្មី និងចែកជូនដល់ប្រជាពលរដ្ឋជិត៤០ម៉ឺនសន្លឹកក្នុងឆ្នាំ២០១៨នេះ។
យោងតាមរបាយការណ៍របស់ក្រសូងមហាផ្ទៃ ចេញផ្សាយកាលពីម្សិលមិញឲ្យដឹងថា ក្រសួងបានផលិតអត្តសញ្ញាណប័ណ្ណសញ្ជាតិខ្មែរគំរូថ្មីបានចំនួន ៣៩៣ ៥៩១សន្លឹក និងប្រគល់ជូនស្នងការដ្ឋាននគរបាលរាជធានី-ខេត្ត ដើម្បីចែកជូនប្រជាពលរដ្ឋបានចំនួន ៣៦៨ ៥២៩សន្លឹក ។
តាមរបាយការណ៍ដដែលនេះ ក្រសូងមហាផ្ទៃបានកែតម្រូវអត្តសញ្ញាណប័ណ្ណសញ្ជាតិខ្មែរគំរូថ្មីដែលខុស ស្ទូន ខ្ចៅដៃ និងបាត់ ហើយបានបោះពុម្ភឡើងវិញ បានចំនួន ៦៥ ៥៥៩សន្លឹក។ ក្រសួងក៏បានកែតម្រូវទិន្នន័យមិនបានការចំនួន ២១៣ ៤២៣នាក់ និងដោះស្រាយជូនប្រជាពលរដ្ឋតាមបណ្ដាយទំនាក់ទំនងសង្គមផ្សេងៗបានចំនួន ៥ ៦៥៤ នាក់ ។
ចាប់តាំងពីដើមឆ្នាំ២០១២ ដល់ថ្ងៃទី២០ ខែធ្នូ ឆ្នាំ២០១៨ ក្រសួងមហាផ្ទៃបានផលិតអត្តសញ្ញាណប័ណ្ណសញ្ជាតិខ្មែរបានចំនួន ១០ ១០១ ២៥៩សន្លឹក និងប្រគល់ជូនស្នងការដ្ឋាននគរបាលរាជធានី ខេត្ត បានចំនួន ១០ ០៨១ ៤៧២សន្លឹក លើផែនការ ១០ ៩៤៤ ១០១នាក់ ។
