អាជ្ញាធរហ្វីលីពីន ចាប់ខ្លួននាយកប្រតិបត្តិសារព័ត៌មានអនឡាញ Rappler ដែលត្រូវបានគេស្គាល់ថាជាសារព័ត៌មានមួយដែលសរសេររិះគន់ការដឹកនាំរបស់ប្រធានាធិបតី ឌូតឺតេ។
នាយកប្រតិបត្តិសារព័ត៌មានអនឡាញ Rappler លោកស្រី ម៉ារៀ រេសា (Maria Ressa) ត្រូវបានចាប់ខ្លួនក្នុងការិយាល័យរបស់អ្នកស្រីកាលពីល្ងាចម្សិលមិញ។ តាមការផ្សាយផ្ទាល់របស់ Rappler មន្រ្តីមកពីការិយាល័យស៊ើបអង្កេតជាតិទទួលបន្ទុកបទល្មើសតាមអ៊ិនធឺណិតបានទៅដល់ស្នាក់ការកណ្ដាលសារព័ត៌មានមួយនេះ។
សារព័ត៌មានអនឡាញ Rappler បានចុះផ្សាយជាបន្តបន្ទាប់នូវអត្ថបទដែលរិះគន់ការបង្រ្កាបរបស់ប្រធានាធិបតី ឌូតឺតេ ទៅលើក្រុមឧក្រិដ្ឋជនគ្រឿងញៀន ដែលបណ្ដាលឲ្យមានការសម្លាប់ជនសង្ស័យជាច្រើននាក់។
លោកស្រី ត្រូវបាននាំខ្លួនយកទៅឃុំនៅការិយាល័យស៊ើបអង្កេតជាតិហ្វីលីពីនពេញមួយយប់។ អ្នកសារព័ត៌មានជើងចាស់រូបនេះ ត្រូវបានចោទប្រកាន់ទាក់ទងនឹងការសរសេរបង្ខូចកេរ្តិ៍ឈ្មោះ ដោយយោងទៅតាមច្បាប់បទល្មើសតាមអ៊ិនធឺណិតដែលបង្កើតឡើងកាលពីឆ្នាំ២០១២។
កាលពីខែឧសភា ឆ្នាំ២០១២ សារព័ត៌មានអនឡាញ Rappler បានចេញផ្សាយអត្ថបទមួយដែលនិយាយពីទំនាក់ទំនងរវាងអ្នកជំនួញ និងអតីតចៅក្រមនៅតុលាការកំពូលម្នាក់របស់ហ្វីលីពីន។ ប៉ុន្តែ ច្បាប់ស្តីពីបទល្មើសតាមប្រព័ន្ធអ៊ិនធឺណិតបានចូលជាធរមាន ៤ខែ ក្រោយអត្ថបទនេះចេញផ្សាយ ពោលគឺខែកញ្ញា ឆ្នាំ២០១២។
លោកស្រី ម៉ារៀ រេសា ថាការចាប់ខ្លួនលោកស្រីបង្ហាញពីកម្រិតដែលរដ្ឋាភិបាលធ្វើក្នុងការបំបិទសម្លេងអ្នកសារព័ត៌មាន។
អង្គការសមាគមអ្នកសារព័ត៌មាន និងសិទ្ធមនុស្សជាច្រើនបានថ្កោលទោសការចាប់ខ្លួនអ្នកសារព័ត៌មានដ៏ល្បីរូបនេះ។
សហព័ន្ធអ្នកសារព័ត៌មានហ្វីលីពីន ចាត់ទុកការចាប់ខ្លួនលោកស្រី ម៉ារៀ រេសា ដោយចោទពីបទបង្ខូចកេរ្តិ៍ឈ្មោះតាមអ៊ិនធឺណិត គឺជាទង្វើគួរឲ្យខ្មាស់អៀន។ សហព័ន្ធនេះ ក៏បានរិះគន់រដ្ឋាភិបាលហ្វីលីពីនផងដែរថា កំពុងតែព្យាយាមបំបិទសម្លេងប្រព័ន្ធផ្សព្វផ្សាយដែលរិះគន់រដ្ឋាភិបាល។
អង្គការឃ្លាំមើលសិទ្ធិមនុស្ស Human Rights Watch បានលើកឡើងថា ការឃាត់ខ្លួនអ្នកសារព័ត៌មានរូបនេះ មិនត្រឹមតែជាយុទ្ធនាការរបស់រដ្ឋាភិបាលដែលធ្វើឡើងដើម្បីគំរាមកំហែង និងបំបិទប្រព័ន្ធផ្សាយដែលសរសេររិះគន់លោកប៉ុណ្ណោះទេ តែវាក៏ជាសារព្រមានដល់ស្ថាប័ននីតិបញ្ញតិ តុលាការ សង្គមស៊ីវិល និង វិហារកាតូលិកផងដែរ។ អង្គការនេះ ក៏បានស្នើឲ្យដោះលែងនិងទម្លាក់ចោលបទចោទនានាប្រឆាំងលោកស្រី ម៉ារៀ រេសា ជាបន្ទាន់។
អង្គការលើកលែងទោសអន្តរជាតិ Amnesty International ក៏បានអំពាវស្រដៀងគ្នានឹងអង្គការឃ្លាំមើលសិទ្ធិមនុស្ស Human Rights Watch ដោយថា ការចោទប្រកាន់ និងចាប់ខ្លួនលោកស្រី ម៉ារៀ រេសា ធ្វើឡើងក្រោមហេតុផលនយោបាយ។
ទោះយ៉ាងណាក្តី នៅព្រឹកថ្ងៃព្រហស្បតិ៍នេះ លោកស្រី ម៉ារៀ រេសា ត្រូវបានដោះលែងឲ្យនៅក្រៅឃុំបណ្ដោះអាសន្នហើយ ដោយតម្តល់ប្រាក់ជិត២០០០ពាន់ដុល្លារ។
លោកស្រី Maria Ressa ក៏មានជាប់បណ្ដឹងមួយទៀតផងដែរ ករណីគេចវេសពីការបង់ពន្ធនិងខកខានក្នុងការដាក់លិខិតប្រកាសពន្ធ៕