នាយករដ្ឋមន្ត្រីកម្ពុជា លោក ហ៊ុន សែន បានបង្ហាញក្តីសង្ឃឹមថា បើទោះបីកម្ពុជាគ្មានប្រព័ន្ធអនុគ្រោះពន្ធ «អ្វីៗគ្រប់យ៉ាងលើកលែងតែអាវុធ» (EBA)របស់សហភាពអឺរ៉ុបក៏ដោយ ក៏លោកថា កម្ពុជាមិនស្លាប់ដែរ ដោយថា ចំណូលពន្ធក្នុងស្រុក អាចចិញ្ចឹមមន្ត្រីរាជការបាន។
ក្នុងពិធីបិទសន្និបាតនៅក្រសួងមហាផ្ទៃ នាថ្ងៃទី១៤ កុម្ភៈនេះ លោក ហ៊ុន សែន បានអំពាវនាវទៅអ្នកវិនិយោគឲ្យមានជំនឿលើការធ្វើកំណែទម្រង់របស់រដ្ឋាភិបាល ជាអ្វីដែលលោកហៅថា ដើម្បីជំរុញលទ្ធភាពប្រកួតប្រជែងជាមួយប្រទេសក្នុងតំបន់។
លោក ហ៊ុន សែន ថ្លែងទៀតថា យន្តការកំណែទម្រង់នេះ កម្ពុជាអាចដើរទៅមុខបានដោយខ្លួនឯង បើទោះបីជាកម្ពុជាត្រូវបាត់បង់ប្រព័ន្ធអនុគ្រោះនេះក៏ដោយ។
មេដឹកនាំរូបនេះ អំពាវទៅកម្មករ ប្រជាពលរដ្ឋ មន្ត្រីរាជការ កងម្លាំងប្រដាប់អាវុធ និងមន្ត្រីចូលនិវត្តន៍ កុំព្រួយបារម្ភថា ការបាត់បង់ប្រព័ន្អអនុគ្រោះពន្ធ EBA នេះ បង្កផលប៉ះពាល់ធ្ងន់ធ្ងរដល់កម្ពុជានោះ។
លោក ហ៊ុន សែន ថ្លែងថា៖ «ខ្ញុំបញ្ជាក់ប្រាប់អ្នកឯងឲ្យបានច្បាស់ថា ពេលនេះម៉ោងនេះ បើទោះបីគ្មានចំណូលបន្ថែម រដ្ឋាភិបាល ហ៊ុន សែន មានសមត្ថភាពបើកប្រាក់ខែជូនមនុស្សទាំងអស់រយៈពេល ១២ខែ ដោយមិនចាំបាច់មានចំណូលថ្មី»។
សហភាពអឺរ៉ុបកាលពីថ្ងទី១២ កុម្ភៈកន្លងមកនេះ បានចាប់ផ្ដើមដំណើរការនីតិវិធីឈានទៅដកប្រព័ន្ធអនុគ្រោះពន្ធ EBA ពីកម្ពុជា ដោយអះអាងថា វិធានការនេះ កើតឡើងក្រោយពីខ្លួនមើលឃើញថា រដ្ឋាភិបាលកម្ពុជាដែលដឹកនាំដោយលោក ហ៊ុន សែន មិនបានស្តារប្រជាធិបតេយ្យឡើងវិញ ខណៈអតីតបក្សប្រឆាំងនៅតែត្រូវបានគេផាត់ចេញពីឆាកនយោបាយ ចំណែកប្រធានគណបក្សនេះ លោក កឹម សុខា នៅតែបន្តឃុំខ្លួនជិត ១៨ខែមកនេះ៕