រដ្ឋមន្ត្រីការពារជាតិ លោក ទៀ បាញ់ បានសម្រេចតែងតាំងមេបញ្ជាការថ្មីនៃបញ្ជាការដ្ឋានកងរាជអាវុធហត្ថខេត្តរតនគិរី ជំនួសលោក គឹម រស្មី ដែលត្រូវលោកនាយករដ្ឋមន្ត្រី ហ៊ុន សែន ដកហូតមុខតំណែង និងបណ្ដេញចេញពីក្របខណ្ឌ។
ក្នុងសេចក្តីសម្រេចចុះថ្ងៃទី១៤ ខែកុម្ភៈនេះ លោក ទៀ បាញ់ បានតែងតាំងឧត្តមសេនីយ៍ ថាវ យ៉េន មេបញ្ជាការរង និងជានាយសេនាធិការ បញ្ជាការដ្ឋានកងរាជអាវុធហត្ថខេត្តរតនគិរីបច្ចុប្បន្ន ឲ្យកាន់តំណែងជាមេបញ្ជាការដ្ឋានកងរាជអាវុធហត្ថខេត្តរតនគិរី ជំនួសតំណែងលោក គឹម រស្មី។
អតីតមញ្ជាការកងរាជអាវុធហត្ថខេត្តរតនគិរី ឧត្តមសេនីយត្រី(ផ្កាយ១) លោក គឹម រស្មី ត្រូវព្រះមហាក្រត្រចេញពីរាជក្រឹត្យលុបឈ្មោះចេញពីក្របខណ្ឌកងយោធពលខេមរភូមិន្ទកាលពីថ្ងៃទី៩ ខែកុម្ភៈ ទៅតាមការស្នើសុំរបស់លោកនាយករដ្ឋមន្ត្រី ហ៊ុន សែន។
ការស្នើសុំលុបលោក គឹម រស្មី ចេញពីក្របខណ្ឌកងយោធពលខេមរភូមិន្ទនេះ ធ្វើឡើងក្រោយពីមានសារសំឡេងបង្ហោះលើបណ្តាញសង្គម ថា លោក គឹម រស្មី បានចែកលុយ ១០ម៉ឺនដុល្លារ ឲ្យកូន ៥នាក់ ក្នុងពិធីខួបកំណើតរបស់ខ្លួន។
ប្រធានអង្គភាពប្រឆាំងអំពើពុករលួយ (ACU) លោក ឱម យិនទៀង ត្រូវបានដកស្រង់សម្ដីដោយវិទ្យុបារាំងដែលបានចុះផ្សាយថា អង្គភាព ACU បានបើកការស៊ើបអង្កេតលើអតីតមេបញ្ជាការប៉េអឹមខេត្តរតនគិរីរូបនេះ ដោយសង្ស័យថា ជាប់ពាក់ព័ន្ធនឹងអំពើពុករលួយ៕