គណៈកម្មាធិការជាតិរៀបចំការបោះឆ្នោត (គ.ជ.ប) អំពាវនាវឲ្យគណបក្សនយោបាយទាំងអស់ទៅចុះបញ្ជីឈរឈ្មោះ នឹងបញ្ជីបេក្ខជនឈរឈ្មោះបោះឆ្នោតក្រុមប្រឹក្សារាជធានី-ខេត្ត និងក្រុង ស្រុក ខណ្ឌ នៅដើមខែក្រោយនេះ។
សេចក្តីជូនដំណឹងរបស់ គ.ជ.ប ចុះផ្សាយកាលពីថ្ងៃទី១៤ ខែកុម្ភៈម្សិលមិញនេះ បានឲ្យដឹងថា គណបក្សនយោបាយទាំងអស់ដែលបានចុះបញ្ជីនៅក្រសួងមហាផ្ទៃ ហើយមានបំណងសុំចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះសម្រាប់ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៣ ត្រូវទៅយកគំរូពាក្យសុំនៅលេខាធិការដ្ឋានគណៈកម្មការរាជធានី-ខេត្តរៀបចំការបោះឆ្នោត (គធ.ខប) ឬអាចទាញយកគំរូពាក្យសុំនេះពីគេហទំព័រ (www.necelect.org.kh)។ រយៈពេលនៃការចុះបញ្ជីនេះមាន៥ថ្ងៃ គឺចាប់ផ្តើមនៅថ្ងៃទី០៧ ខែមីនា ដល់ថ្ងៃទី១១ ខែមីនា ឆ្នាំ២០១៩ រៀងរាល់ម៉ោងធ្វើការ។
សេចក្តីជូនដំណឹងដដែលបញ្ជាក់ថា ពាក្យសុំចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ គឺត្រូវមានភ្ជាប់មកជាមួយនូវឯកសារពាក់ព័ន្ធដូចមានក្នុងទម្រង់បែបបទលេខ១០០៨។
ការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៣នេះ នឹងប្រព្រឹត្តទៅ នៅថ្ងៃទី២៦ ខែឧសភា ឆ្នាំ២០១៩៕