តុលាការធម្មនុញ្ញរបស់ថៃបានទទួលពាក្យបណ្តឹងកាលពីថ្ងៃពុធ ដើម្បីសុំឲ្យពិនិត្យលើសុពលភាពរបស់គណបក្ស Thai Raksa Chart ថា អាចបន្តចូលរួមប្រកួតប្រជែងការបោះឆ្នោត ឬ ត្រូវរំលាយចោល។
តាមគម្រោងតុលាការធម្មនុញ្ញនឹងបើកសវនាការពិនិត្យលើគណបក្ស Thai Raksa Chart នៅថ្ងៃទី២៧ ខែកុម្ភៈ។
គណបក្ស Thai Raksa Chart បង្កើតឡើងដោយក្រុមអ្នកគាំទ្រលោក ថាក់ ស៊ីន ហើយការឈានដល់ការត្រួតពិនិត្យ ដោយសារបក្សនេះដាក់ម្ចាស់ក្សត្រី Ubolratana ជាបេក្ខជននាយករដ្ឋមន្ត្រី នាំឲ្យខាងព្រះបរមរាជវាំងចោទថា បំពានរដ្ឋធម្មនុញ្ញ។
ការរំលាយគណបក្សដែលស្និទ្ធជាមួយលោក ថាក់ ស៊ីន នេះ ក៏អាចសមតាមបំណងរបស់ក្រុមយោធា និងខាងព្រះបរមរាជវាំងដែរ ព្រោះក្រុមនេះមិនចង់ឲ្យក្រុមលោក ថាក់ ស៊ីន ចូលឆាកនយោបាយវិញទេ។ លោក ថាក់ ស៊ីន លេចធ្លោក្នុងនយោបាយថៃតាំងពីឆ្នាំ២០០១ ហើយទោះបីជាមានការរំលាយគណបក្សលោក និងរារាំងមិនឲ្យធ្វើនយោបាយក៏ពលរដ្ឋថៃ ពិសេសក្រុមកសិករឬ ក្រុមអាវក្រហមនៅតែគាំទ្រលោក។
លទ្ធផលនៃការបោះឆ្នោតកាលពីឆ្នាំ២០០១ លោក ថាក់ ស៊ីន ទទួលបានជ័យជម្នះ ក្រោយមក មានការរំលាយគណបក្សលោក និងរារាំងមិនឲ្យធ្វើនយោបាយ ប្អូនស្រីរបស់លោកគឺលោកស្រី យីង ឡាក់ ជាប់ឆ្នោតទៀតនៅឆ្នាំ២០១១។
ចំណែកការបោះឆ្នោតនៅថ្ងៃទី២៤ ខែមីនាខាងមុខនេះ មានការរំពឹងថា អ្នកគាំទ្រលោក ថាក់ ស៊ីន នឹងបោះឆ្នោតគាំទ្រគណបក្ស Thai Raksa Chart។ ប៉ុន្តែ បើមានការរំលាយគណបក្សនេះមែន អាចនឹងផ្ទុះការតវ៉ាជាថ្មីពីក្រុមអ្នកគាំទ្របក្សនេះ។
ព្រឹត្តិការណ៍បង្ក្រាបបង្ហូរឈាមមួយក្នុងទីក្រុងបាងកកចន្លោះពីថ្ងៃទី១៣ ដល់ថ្ងៃទី១៩ ខែឧសភា ឆ្នាំ២០១០ បណ្តាលឲ្យមានអ្នកស្លាប់៨៥ និងរបួសជាង២០០នាក់។ ពេលនោះក្រុមយោធាបង្ក្រាបលើការតវ៉ារបស់ក្រុមរណសិរ្សរួបរួមជាតិប្រឆាំងរបបផ្តាច់ការ គឺជាក្រុមរបស់ពួកអាវក្រហមគាំទ្រលោក ថាក់ ស៊ីន។
ក្រៅពីព្រឹត្តិការណ៍បង្ក្រាបទ្រង់ទ្រាយធំនៅក្នុងខែឧសភា ឆ្នាំ២០១០នេះ ក៏មានចលនាតវ៉ា និងបង្ក្រាបផ្សេងៗទៀតដែលបណ្តាលឲ្យមានអ្នកស្លាប់និងរងរបួសផងដែរ ចាប់តាំងពីការទម្លាក់លោក ថាក់ ស៊ីន កាលពីឆ្នាំ២០០៦មក។
បើទោះបីជាថៃស្ថិតនៅក្រោមរបបយោធាតាំងពីឆ្នាំ២០១៤មក ដែលមានរឹតត្បិតសេរីភាពនានា ក៏នៅតែមានការតវ៉ាជាបន្តបន្ទាប់នៅក្នុងទីក្រុងបាងកកដែរ។
នៅដើមឆ្នាំ២០១៩នេះ ក្រោយពេលរបបយោធាប្រកាសលើកពេលបោះឆ្នោតជាថ្មីទៀតថា ការបោះឆ្នោតគ្រោងធ្វើនៅថ្ងៃទី២៤ខែកុម្ភៈ ត្រូវលើកទៅធ្វើនៅដើមខែឧសភាវិញនោះ ប្រជាពលរដ្ឋថៃក្នុងទីក្រុងបាងកកនាំគ្នាដើរតវ៉ាតាមដងផ្លូវ រហូតដល់ព្រះមហាក្សត្រអន្តរាគមន៍សម្រេចឲ្យរៀបចំការបោះឆ្នោតនៅថ្ងៃទី២៤ ខែមីនា ទើបពួកគេឈប់តវ៉ា។
នយោបាយបែងចែកក្រុមអាវក្រហម និងអាវលឿងនៅក្នុងប្រទេសថៃ អាចនឹងផ្ទុះការតវ៉ាជាថ្មីទៀត បើសិនជាមិនមានដំណោះស្រាយផ្លូវកណ្តាលណាមួយ ហើយឈានដល់ការរំលាយគណបក្ស Thai Raksa Chart។
