កម្ពុជាដោះលែងជនជាតិម៉ាឡេស៊ីចំនួន៤៧នាក់ដែលរងការចោទថា បើកល្បែងភ្នាល់តាមអនឡាញខុសច្បាប់ នៅក្នុងខេត្តបន្ទាយមានជ័យ។
តាមលិខិតថ្លែងអំណរគុណរបស់ស្ថានទូតម៉ាឡេស៊ីប្រចាំកម្ពុជា ចុះផ្សាយកាលពីម្សិលមិញគឺកម្ពុជាបានដោះលែងពលរដ្ឋម៉ាឡេស៊ីទាំង៤៧នាក់នោះនៅម៉ោង៦កន្លះល្ងាចម្សិលមិញ។
នៅក្នុងលិខិតនេះក៏បានថ្លែងអំណរគុណដល់លោកនាយករដ្ឋមន្ត្រីហ៊ុន សែន និង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិដែលយកចិត្តទុកដាក់ក្នុងការដោះស្រាយតាមសំណើរបស់ម៉ាឡេស៊ី។
កាលពីចុងខែធ្នូ ឆ្នាំ២០១៨ សមត្ថកិច្ចខេត្តបន្ទាយមានជ័យ ចុះឃាត់ខ្លួនជនជាតិម៉ាឡេស៊ី៤៧នាក់ និងជនជាតិចិន៨នាក់ នៅភូមិសាមគ្គីមានជ័យ និងភូមិព្រៃព្រិច សង្កាត់ប៉ោយប៉ែត ក្រុងប៉ោយប៉ែត បន្ទាប់ពី រកឃើញថា ជនជាតិបរទេសទាំងនោះបើកល្បែងអនឡាញខុសច្បាប់នៅកម្ពុជា។
ទោះយ៉ាងណាខាងរដ្ឋាភិបាលម៉ាឡេស៊ី លើកឡើងថា ពលរដ្ឋរបស់ខ្លួនចំនួន៤៧នាក់នេះ ចាញ់បោកក្រុមហ៊ុនដែលជ្រើសរើសពលករដែលគ្រប់គ្រងដោយក្រុមអ្នកជួញដូរមនុស្ស។