ក្រសួងរំឭកថាជំងឺមួយចំនួនអាចប៉ះពាល់អាយុជីវិតក្នុងរដូវក្តៅនេះ

ក្រសួងសុខាភិបាលបានណែនាំឲ្យប្រជាពលរដ្ឋបង្កើនការប្រុងប្រយ័ត្នខ្ពស់នៅក្នុងអំឡុងពេលរដូវក្តៅឆ្នាំនេះ ដោយថា ជំងឺមួយចំនួនអាចប៉ះពាល់ដល់អាយុជីវិត​។​

ក្នុងសេចក្តីប្រកាសព័ត៌មានកាលពីម្សិលមិញ ក្រសួងលើកឡើងថា ជំងឺដែលអាចប៉ះពាល់នោះរួមមាន បញ្ហាបេះដូង និងសួត និងអាចមានជំងឺឆ្លងផ្សេងៗទៀតដូចជា​ រាក ឬជំងឺកង្វះចំណីអាហារផងដែរ។​

ក្រសួងបានណែនាំវិធីសាស្ត្រការពារមួយចំនួនដូចជា ត្រូវទទួលទានទឹកឆ្អិនឲ្យបានច្រើននិងញឹកញាប់ ហើយហាត់ប្រាណនៅកន្លែងក្តៅត្រូវចាប់ផ្តើមដោយយឺតៗ  ចៀសវាងអាហារក្តៅឬបរិភោគអាហារច្រើនពេក កាត់បន្ថយការប៉ះកំដៅព្រះអាទិត្យផ្ទាល់ និងត្រូវប្រកាន់អនាម័យជានិច្ច។​

រដ្ឋាភិបាលកម្ពុជាកាលពីថ្ងៃទី១៧ ខែមករា ឆ្នាំ២០១៩ បានចេញសារាចរណែនាំឲ្យប្រជាពលរដ្ឋរក្សាទឹកសម្រាប់ប្រើប្រាស់ នារដូវប្រាំង ដោយកម្ពុជានឹងទទួលឥទ្ធិពលបាតុភូត អែល នីណូ (El Nino) ​​​ដែលធ្វើឲ្យអាកាសធាតុក្តៅហួតហែង។