កសិករខ្មែរពីរគ្រួសារត្រូវបង្ខំឲ្យដកដំឡូងមីលើផ្ទៃដី៦ហិកតា បន្ទាប់ពីសមត្ថកិច្ចថៃយកត្រាក់ទ័រមួយគ្រឿងគំរាមឈូសឆាយដំណាំរបស់ពួកគេ ស្ថិតនៅព្រំដែនដែលមិនទាន់ឯកភាពគ្នានៃប្រទេសទាំងពីរ។
យោងតាមគេហទំព័ររបស់អគ្គស្នងការនគរបាលជាតិបានឲ្យដឹងថា កាលពីថ្ងៃទី១៦ ខែកុម្ភៈ ឆ្នាំ២០១៩ សមត្ថកិច្ចថៃ២៩នាក់បានយកត្រាក់ទ័របម្រុងនឹងឈូសឆាយដំឡូងមីកសិករខ្មែរនៅតំបន់ព្រំដែនកម្ពុជា-ថៃ ដែលស្ថិតនៅ ស្រុកស្វាយចេក ខេត្តបន្ទាយមានជ័យ និងខេត្តស្រះកែវ ប្រទេសថៃ។ សមត្ថកិច្ចថៃបានចោទពលរដ្ឋខ្មែរថា បានដាំដំឡូងមីលើដីបន្ទាត់ព្រំដែនមិនទាន់ច្បាស់លាល់។
ប្រភពដដែលបានឲ្យដឹងថា ក្រោយពីមានការជជែករវាងសមត្ថកិច្ចខ្មែរ និងថៃ ភាគីទាំងពីរក៏ព្រមព្រៀងគ្នាដោយឲ្យកសិករខ្មែរដកដំឡូងមីមានមើមតូច ដែលលមិនទាន់ដល់ពេលត្រូវប្រមូលផល។ កសិករក៏បានយល់ព្រមដកមិនឲ្យលើសពីមួយសប្តាហ៍។
ប្រភពដដែលបានស្រង់សម្តីកសិករថា ពួកគាត់បានចងការប្រាក់ពីធនាគារដើម្បីដាំដំឡូងមី ហើយនៅពេលដែលបង្ខំឲ្យដកដំឡូងមី ពួកគាត់ប្រឈមនឹងគ្មានប្រាក់សងធនាគារ។
ជុំវិញបញ្ហានេះ សមត្ថកិច្ចថៃបានជួបសមត្ថកិច្ចខ្មែរ២លើកមកហើយ ដើម្បីសុំឲ្យកសិករខ្មែរដកដំឡូងមីចោលនៅត្រង់ចំណុចបន្ទាត់ព្រំដែនមិនទាន់ឯកភាពគ្នា និងសុំរក្សាទ្រង់ទ្រាយដើមមិនឲ្យមានការឈូសឆាយព្រៃនៅតាមព្រំដែននោះឡើយ។
