ខ្យល់កន្ត្រាក់បានបំផ្លាញផ្ទះប្រជាពលរដ្ឋ១៩ខ្នងក្នុងខេត្តបាត់ដំបង និងបណ្តាខេត្តមួយចំនួនទៀតក្នុងប្រទេសកម្ពុជានៅចុងសប្តាហ៍នេះ។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក កែវ វី បានប្រាប់ វីអូឌី ឲ្យដឹងថា កម្ពុជាកំពុងទទួលឥទ្ធិពលកម្រិតសម្ពាធទាបដែលធ្វើឲ្យតំបន់មួយចំនួនមានខ្យល់កន្រ្តាក់ និងភ្លៀងកក់ខែ រួមមាន តំបន់ខ្ពង់រាបភាគខាងជើង តំបន់ភាគពាយ័ព្យ និងតំបន់មាត់សមុទ្រ ។
អ្នកនាំពាក្យរូបនេះបានបន្តថា តំបន់ដែលរងផលប៉ះពាល់ច្រើនជាងគេគឺខេត្តបាត់ដំបង ដែលធ្វើឲ្យខូចខាតផ្ទះ១៩ខ្នង និងឃ្លាំងស្តុកដំឡូងមីធំមួយ កាលពីម្សិលមិញនេះ ប៉ុន្តែមិនបណ្តាលឲ្យប្រជាពលរដ្ឋរងរបួសនោះទេ។
ក្រសួងធនធានទឹក និងឧតុនិយម កាលពីថ្ងៃទី១៦ ខែកុម្ភៈ ឆ្នាំ២០១៩នេះ បានជូនដំណឹងដល់សាធារណ:ជនឲ្យមានការប្រុងប្រយ័ត្ន ចាប់ពីថ្ងៃទី១៦ ដល់ ២២ ខែកុម្ភៈនេះ ដោយកម្ពុជានឹងមានបាតុភូតរន្ទៈ និងខ្យល់កន្ត្រាក់នៅពេលមានភ្លៀងធ្លាក់។