ក្មេងស្រី២នាក់បានលង់ទឹកស្លាប់និង៤នាក់ផ្សេងទៀតត្រូវបានជួយសង្គ្រោះ នៅពេលដែលពួកគេហែលទឹកលេងនៅអាងពង្រ ស្ថិតនៅក្នុង ក្រុងសិរីសោភ័ណ ខេត្តបន្ទាយមានជ័យ កាលពីម្សិលមិញ។
អធិការនគរបាលក្រុងសិរីសោភ័ណ លោក ស៊ី ឌី បានប្រាប់ វីអូឌី ថា កាលពីថ្ងៃទី១៧ ខែកុម្ភៈ ឆ្នាំ២០១៩ មានក្មេងៗមួយក្រុមហែលទឹកលេងក្នុងអាងពង្រ ដែលមានជម្រៅ៣ទៅ៤ម៉ែត្រ ក្នុងនោះមានក្មេងចំនួន២នាក់បានលង់ទឹកស្លាប់ និងជួយសង្គ្រោះបានចំនួន៤នាក់ ដោយអ្នកបង់ត្រីនៅក្បែរនោះ។
បើតាមការចុះផ្សាយរបស់អគ្គស្នងការនគរបាលជាតិ ឲ្យដឹងថា ក្មេងស្រីដែលបាត់បង់ជីវិតឈ្មោះ បឿន ស្រីណូ ភេទស្រី អាយុ ៩ឆ្នាំ រស់នៅជាមួយជីដូន ខណ:ពេលដែល ឪពុកម្តាយធ្វើការនៅប្រទេសថៃ និងក្មេងស្រីម្នាក់ទៀតឈ្មោះ ប៉ុច សុឃីម ភេទស្រី អាយុ១១ឆ្នាំ។
លោក ស៊ី ឌី បានអំពាវនាវដល់អាណាព្យាបាល និងឪពុកម្តាយទាំងអស់គួរមានការប្រុងប្រយ័ត្នដោយមិនត្រូវបណ្តោយកុមារតូចៗមកលេងរណ្តៅទឹកអាងនោះទេ។
កាលពីថ្ងៃទី ៦ ខែកុម្ភៈ ឆ្នាំ២០១៩ ក៏មានក្មេងស្រីចំនួន២នាក់បានលង់ទឹកស្លាប់ ស្ថិតក្នុង ស្រុកថ្មពួក ខេត្តបន្ទាយមានជ័យដដែរនេះ ៕