ប្រទេសវៀតណាម កំពុងរៀបចំធ្វើជាម្ចាស់ផ្ទះក្នុងការទទួលមេដឹកនាំអាមេរិក លោក ដូណាល់ ត្រាំ និងមេដឹកនាំកូរ៉េខាងជើងលោក គីម ជុងអ៊ុន។
តើការធ្វើជាម្ចាស់ក្នុងការរៀបចំជំនួបកំពូលនេះ ផ្ដល់ផលប្រយោជន៍អ្វីខ្លះដល់ប្រទេសវៀតណាម?
គ្រាន់តែលោក ដូណាល់ ត្រាំ ប្រកាសពីការកំណត់យកប្រទេសនេះជាកន្លែងជួបគ្នាជាមួយលោក គីម ជុងអ៊ុន សារព័ត៌មានបរទេសធំៗបានជាច្រើនចុះផ្សាយពីប្រទេសវៀតណាម។
សារព័ត៌មានធំៗខ្លះ ចុះផ្សាយពីមូលហេតុដែលវៀតណាមត្រូវបានជ្រើសរើស។ មូលហេតុដែលសារព័ត៌មានទាំងនោះរៀបរាប់ជាអាទិ៍ រួមមាន កត្តាប្រវត្តិសាស្រ្តដែលវៀតណាមប្រែក្លាយអាមេរិកដែលធ្លាប់ជាសត្រូវឲ្យក្លាយជាមិត្ត ទំនាក់ទំនងល្អទាំងជាមួយកូរ៉េខាងជើង និងអាមេរិក និងសន្តិសុខរបស់ប្រទេសនេះជាដើម។
ការរៀបរាប់របស់បណ្ដាញសារព័ត៌មានទាំងនោះ វាប្រាកដណាស់ថា នឹងជួយឲ្យអ្នកវិនិយោគបរទេសមួយចំនួនសម្លឹងឃើញពីសក្ដានុពលរបស់ប្រទេសនេះ។ ជាក់ស្តែង នាយករដ្ឋវៀតណាម លោក ង្វៀន សួនហ្វុក (Nguyen Xuan Phuc) កាលពីថ្ងៃទី១២ ខែកុម្ភៈ កន្លងទៅ ក៏បានលើកឡើងផងដែរនូវការធ្វើជាម្ចាស់ផ្ទះរៀបចំកិច្ចប្រជុំនេះ ជាសញ្ញាល្អប្រាប់ទៅអ្នកវិនិយោគថា វៀតណាមមានសុវត្ថិភាពអាចជឿទុកចិត្តបានក្នុងការប្រកបរបរទទួលទាន។
សារព័ត៌មានមួយចំនួនទៀត ក៏បានធ្វើការទស្សន៍ទាយដោយវិភាគពីទីតាំងថា តើទីក្រុងហាណូយ ឬ ដាណាង ដែលត្រូវបានជ្រើសរើសជាកន្លែងជួបគ្នារវាងលោក ដូណាល់ ត្រាំ និង លោក គីម ជុងអ៊ុន។ សារព័ត៌មានទាំងនោះ បានរៀបរាប់ពីគុណសម្បត្តិនានានៃតំបន់ទាំងពីរនេះ។ ការនិយាយរៀបរាប់ពីតំបន់ទាំងនោះ ធ្វើឲ្យគេស្គាល់កាន់តែច្បាស់ពីតំបន់ទេសចរណ៍របស់វៀតណាម។
តិច ឬច្រើនតាមរយៈការចុះផ្សាយទាំងនោះ ទេសចរបរទេសប្រាកដជានឹងមកទស្សនាប្រទេសកុម្មុយនីស្តមួយនេះ។
ក្រៅពីការទាក់ទាញវិនិយោគិន និងភ្ញៀវទេសចរ ផលចំណេញមួយទៀតដ៏ធំដែលវៀតណាមទទួលបាន គឺកិត្យានុភាពរបស់ប្រទេសនេះនៅលើឆាកអន្តរជាតិ។ ការធ្វើជាម្ចាស់ផ្ទះរៀបចំកិច្ចប្រជុំនេះ បង្ហាញប្រាប់ពីសមត្ថភាពរបស់ប្រទេសនេះ ក្នុងការរៀបចំកិច្ចប្រជុំកំពូលធំៗថ្នាក់អន្តរជាតិ។
ការទទួលខុសត្រូវរបស់វៀតណាមក្នុងការរៀបចំជំនួបនេះ ក៏ជាជោគជ័យផ្នែកការទូតមួយដ៏ធំផងដែរក្នុងការទប់ទល់ជាមួយប្រទេសចិនដែលជាអ្នកជិតខាងរបស់ខ្លួន។
ជំនួបជាប្រវត្តិសាស្រ្តជាលើកទី២រវាងលោក ដូណាល់ ត្រាំ និង លោក គីម ជុងអ៊ុន នឹងប្រព្រឹត្តទៅនៅថ្ងៃទី២៧ និង២៨ ខែកុម្ភៈនេះ៕