តុលាការប្រទេសម៉ាលេស៊ី កាលពីម្សិលមិញ បានសម្រេចធ្វើការចោទប្រកាន់ទីប្រឹក្សាអតីតនាយករដ្ឋមន្រ្តី លោក ណាជីប រ៉ាហ្សាក់ ពីបទលាងលុយកខ្វក់។
ទីប្រឹក្សារបស់អតីតនាយករដ្ឋមន្រ្តីម៉ាលេស៊ីរូបនេះ មានឈ្មោះថា Paul Stadlen ជាជនជាតិអង់គ្លេស។ តាមការចុះផ្សាយរបស់សារព័ត៌មាន Channel News Asia អតីតប្រធានផ្នែកទំនាក់ទំនងសាធារណៈរបស់លោក ណាជីប រ៉ាហ្សាក់ ត្រូវបានតុលាការចោទប្រកាន់ទាក់ទងនឹងការលាងលុយចំនួនពីរករណី ដែលមានតម្លៃជាទឹកប្រាក់ ៣.២លានដុល្លារ។
យោងតាម Channel News Asia លោក Paul Stadlen មិនមានវត្តមាននៅក្នុងសវនាការកាលពីម្សិលមិញនោះទេ។ បុរសជនជាតិអង់គ្លេសរូបនេះ បានគេចខ្លួនចេញពីប្រទេសម៉ាលេស៊ី បន្ទាប់ពីគណបក្សរបស់លោក ណាជីប រ៉ាហ្សាក់ បានចាញ់ការបោះឆ្នោតកាលពីខែឧសភា ឆ្នាំ២០១៨ កន្លងទៅ។
លោក Paul Stadlen ជាប្រធានក្រុមហ៊ុនដែលធ្វើការលើផ្នែកទំនាក់ទំនងសាធារណៈឈ្មោះថា Apco Malaysia។ លោក បានជួយធ្វើយុទ្ធនាការផ្សព្វផ្សាយនានា ដើម្បីឲ្យមហាជនម៉ាលេស៊ីចាប់អារម្មណ៍លោក ណាជីប រ៉ាហ្សាក់។ ប្រសិនបើតុលាការម៉ាលេស៊ីរកឃើញដូចការចោទប្រកាន់មែន លោក Paul Stadlen អាចប្រឈមនឹងការជាប់ពន្ធនាគារ៥ឆ្នាំ ឬ បង់ប្រាក់ពិន័យជាង១លានដុល្លារ ឬ ទទួលទោសទាំងពីរនេះ។
ការលាងលុយនោះ ត្រូវបានតុលាការរកឃើញថា ជាប់ទាក់ទងនឹងការកឹបកេងប្រាក់ក្នុងគម្រោង 1 Malaysia Development Berhad (1MDB)។
1 Malaysia Development Berhad ជាគម្រោងដែលបង្កើតឡើងដោយនាយករដ្ឋមន្រ្តី ណាជីប រ៉ាហ្សាក់ កាលពីឆ្នាំ២០០៩ ក្នុងគោលបំណងទាក់ទាញអ្នកវិនិយោគបរទេសឲ្យបណ្ដាក់ទុនរកស៊ីនៅម៉ាលេស៊ី។ ប៉ុន្តែ គម្រោងនេះ ត្រូវបានគេរិះគន់ថា ហ៊ុមព័ទ្ធដោយអំពើពុករលួយ។ គណៈកម្មាធិការរដ្ឋសភាម៉ាលេស៊ី បានរកឃើញថា មានភាពមិនប្រក្រតីជាច្រើនទាក់ទងនឹងប្រតិបត្តិការសាច់ប្រាក់ជាង៤ពាន់លានដុល្លារក្នុងគម្រោង 1MDB នេះ។
ទាក់ទងនឹងបញ្ហានេះ ក្រសួងយុត្តិធម៌អាមេរិក បានចោទប្រកាន់ថា លោក ណាជីប រ៉ាហ្សាក់ និងមន្រ្តីរបស់លោក ត្រួវបានក្រុមហ៊ុនមួយឈ្មោះ Jho Low ជួយសម្រួលឲ្យទឹកប្រាក់ដែលកេងប្រវ័ញ្ចពីគម្រោង 1 Malaysia Development Berhad មើលទៅដូចជាទឹកប្រាក់ដែលបានមកពីការប្រកបរបរដែលស្របច្បាប់។ តាមរយៈវិធីនេះ ទឹកប្រាក់ចំនួន៦៨១លានដុល្លារ ត្រូវបានដាក់ចូលក្នុងគណនីផ្ទាល់ខ្លួនរបស់លោក ណាជីប រ៉ាហ្សាក់។
អាជ្ញាធរប្រទេសចំនួន៥ រួមមាន ម៉ាលេស៊ី សឹង្ហបុរី សហរដ្ឋអាមេរិក អង់គ្លេស ស្វីស និងទឹកដីស្វយ័តហុងកុង កំពុងស៊ើបអង្កេតលើរឿងអាស្រូវនៃការប្រព្រឹត្តអំពើពុករលួយក្នុងគម្រោង 1 Malaysia Development Berhad នេះ។
ចាប់តាំងពីអស់អំណាចមក លោក ណាជីប រ៉ាហ្សាក់ ត្រូវបានឃាត់ខ្លួនចំនួន៤លើករួចមកហើយ។ អតីតនាយករដ្ឋមន្រ្តីម៉ាលេស៊ីរូបនេះ ក៏កំពុងប្រឈមនឹងការស៊ើបអង្កើតលើបទចោទចំនួន៤២ករណី ដែលក្នុងនោះរួមមានការប្រព្រឹត្តអំពើពុករលួយ ការលាងលុយកខ្វក់ និងការរំលោភអំណាចជាដើម។
ទោះយ៉ាងណាក៏ដោយ លោក ណាជីប រ៉ាហ្សាក់ បានបដិសេធថាលោកមិនបានប្រព្រឹត្តដូចការចោទប្រកាន់ទាំងអស់នោះទេ៕