រដ្ឋាភិបាលរំឭកអតីតមន្ត្រីបក្សប្រឆាំងដែលជាប់បម្រាមថា ពួកគេអាចទទួលបានសិទ្ធិធ្វើនយោបាយពេញលេញឡើងវិញ តែត្រូវគោរពច្បាប់គណបក្សនយោបាយដែលទើបធ្វើវិសោធនកម្ម មាត្រា៤៥ថ្មី (ស្ទួន)។
សេចក្តីណែនាំស្តីពី បែបបទនិងនីតិវិធីនៃការស្នើសុំនីតិសប្បទាធ្វើនយោបាយឡើងវិញ ចុះថ្ងៃទី២១ ខែកុម្ភៈនេះ ក្រសួងមហាផ្ទៃលើកឡើងថា បុគ្គលដែលចង់ធ្វើនយោបាយឡើងវិញ ត្រូវដាក់ពាក្យស្នើសុំនីតិសម្បទាឡើងវិញទៅក្រសួងមហាផ្ទៃ។
ក្រសួងបន្តថា ពាក្យស្នើសុំនេះ ត្រូវធ្វើឡើងដាច់ដោយឡែកពីគ្នា បន្ទាប់ពីបានពិនិត្យលើពាក្យស្នើសុំរបស់បុគ្គលម្នាក់ៗរួចហើយ ក្រសួងនឹងលើកសំណើជូននាយករដ្ឋមន្ត្រី ដើម្បីស្នើថ្វាយព្រះមហាក្សត្រ លើកលែងបម្រាមនេះ។
ព្រះមហាក្សត្រ ព្រះបរមនាថ នរោត្ដម សីហមុនី បានចេញព្រះរាជក្រម ប្រកាសដាក់ឲ្យប្រើប្រាស់ច្បាប់នេះ ជាផ្លូវការ កាលពីដើមខែមករា ឆ្នាំ២០១៩នេះ។
ប៉ុន្តែ ជិត២ខែមកនេះ មានមន្ត្រីគណបក្សសង្រ្គោះជាតិ តែ២នាក់ប៉ុណ្ណោះ គឺលោក គង់ គាំ និងកូនប្រុស លោក គង់ បូរ៉ា បានដាក់ពាក្យសុំសិទ្ធិធ្វើនយោបាយឡើងវិញ។
តុលាការកំពូល កាលពីថ្ងៃទី១៦ វិច្ឆិកា ឆ្នាំ២០១៧ បានប្រកាសរំលាយអតីតគណបក្សសង្គ្រោះជាតិ តាមបណ្តឹងរបស់ក្រសួងមហាផ្ទៃ។ សាលដីកានេះក៏បានហាមមន្ត្រី១១៨នាក់ មិនឲ្យធ្វើនយោបាយពេល៥ឆ្នាំ។
ប៉ុន្តែ សហគមន៍អន្តជាតិ ដែលនាំមុខគេ ដោយសហរដ្ឋអាមេរិក និងសហភាពអឺរ៉ុប បានចាត់ទុកវិធានការនេះថា ជាការគំរាមកំហែងផ្នែកនយោបាយ និងជំរុញឲ្យស្តារប្រជាធិបតេយ្យឡើងវិញ។
