ថៃអនុញ្ញាតឲ្យពលករខ្មែរឆ្លងដែនឥតគិតថ្លៃរក្សាសិទ្ធិទិដ្ឋាការអំឡុងបុណ្យចូលឆ្នាំ

រដ្ឋាភិបាលថៃអនុញ្ញាតឲ្យពលករខ្មែរដែលកំពុងស្នាក់នៅ និងធ្វើការក្នុងប្រទេសថៃ អាចឆ្លងដែនចូលមកកម្ពុជាវិញដោយឥតគិតថ្លៃរក្សាសិទ្ធិទិដ្ឋាការនៅអំឡុងបុណ្យចូលឆ្នាំខ្មែរខាងមុខ។

ស្ថានទូតកម្ពុជាប្រចាំនៅប្រទេសថៃបានជូនដំណឹងដូចនេះក្នុងសេចក្ដីប្រកាសព័ត៌មានរបស់ខ្លួនចេញផ្សាយកាលពីថ្ងៃទី២២ ខែកុម្ភៈ ឆ្នាំ២០១៩។

បើតាមសេចក្ដីប្រកាសព័ត៌មាន រដ្ឋាភិបាលកម្ពុជា និងថៃបានឯកភាពបែបនេះ ក្នុងគោលបំណងជួយសម្រួលដល់ពលករខ្មែរស្របច្បាប់ ដែលកំពុងស្នាក់នៅ និងធ្វើការក្នុងប្រទេសថៃ ឲ្យអាចធ្វើដំណើរមកកាន់ប្រទេសកម្ពុជា ដើម្បីប្រារព្ធពិធីបុណ្យចូលឆ្នាំខ្មែរ ដោយឥតគិតថ្លៃរក្សាសិទ្ធិទិដ្ឋាការ (Re- Entry Visa) ចាប់ពីថ្ងៃទី៥ ដល់ថ្ងៃទី៣០ មេសា ឆ្នាំ២០១៩។

បើតាមច្បាប់អន្ដោប្រវេសន៍ថៃ ការស្នើសុំរក្សាសិទ្ធិទិដ្ឋាការប្រភេទចេញ-ចូល ក្នុងមួយលើកមានតម្លៃ ១០០០បាត និងប្រភេទចេញ-ចូលច្រើនលើក មានតម្លៃ ៣៨០០បាត៕