លោកនាយករដ្ឋមន្ត្រី ហ៊ុន សែន បានអំពាវនាវទៅដល់ប្រជាពលរដ្ឋកុំឲ្យភ័យស្លន់ស្លោទៅនឹងជំងឺឆ្កែឆ្កួត ដោយថា រដ្ឋាភិបាលកំពុងយកចិត្តទុកដាក់ផ្តល់សេវាចាក់ថ្នាំវ៉ាក់សាំងនៅតាមមន្ទីរពេទ្យរដ្ឋ និងឯកជន ជូនប្រជាពលរដ្ឋនៅទូទាំងរាជធានីខេត្ត។
ការអំពាវនាវនេះ ធ្វើឡើងបន្ទាប់ពីប្រជាពលរដ្ឋមកពីបណ្តាខេត្ត-រាជធានី សម្រុកឡើងមករកសេវាចាក់ថ្នាំវ៉ាក់សាំងនៅវិទ្យាស្ថានប៉ាស័្ទរក្នុងរាជធានីភ្នំពេញ ក្រោយពីក្មេងស្រីម្នាក់អាយុ ១០ឆ្នាំ រស់នៅខេត្តស្វាយរៀង ត្រូវបានឆ្មាខាំ និងក្រញៅ បណ្តាលឲ្យឆ្លងជំងឺឆ្កែឆ្កួតស្លាប់ កាលពីយប់ថ្ងៃទី១៣ ខែកុម្ភៈ ឆ្នាំ២០១៩។
ក្នុងពិធីអបអរសាទរ «ទិវាជាតិទីក្រុងស្អាត» លើកទី៧ លោកនាយករដ្ឋមន្ត្រី ហ៊ុន សែន បានថ្លែងនៅថ្ងៃនេះថា ប្រជាពលរដ្ឋមួយចំនួនដែលឆ្កែខាំ និងខ្លះទៀតឆ្កែមិនខាំ កំពុងតែស្វែងរកសេវាចាក់វ៉ាក់សាំងនៅវិទ្យាស្ថានប៉ាស្ទ័រ។ ករណីនេះ លោកថ្លែងថា កុំឲ្យប្រជាពលរដ្ឋតក់ស្លុតពាក់ព័ន្ធជំងឺឆ្កែឆ្កួតខាំនេះ ដោយថា រដ្ឋាភិបាលបានណែនាំមន្ត្រីជំនាញឲ្យពង្រាយសេវាចាក់វ៉ាក់សាំងនៅតាមមន្ទីរពេទ្យនៅរាជធានី-ខេត្ត ឬក៏អាចឲ្យគ្លីនិកឯកជន ជួយផ្តល់សេវាវ៉ាក់សាំងនេះបន្ថែមទៀតផងដែរ។
លោកនាយករដ្ឋមន្ត្រី ហ៊ុន សែន ក៏បានក្រើនរំលឹកដល់ប្រជាពលរដ្ឋ កុំឲ្យទៅប្រលែងលេងជាមួយឆ្កែ ឬសត្វមានពិស។
វិទ្យាស្ថានប៉ាស្ទ័រកម្ពុជា បានរៀបរាប់នៅលើទំព័រហ្វេសប៊ុករបស់ខ្លួនកាលពីសប្ដាហ៍មុនថា ស្ថាប័នមួយនេះកំពុងព្យាយាមផ្ដល់សេវាដល់ប្រជាពលរដ្ឋទូទៅ ប៉ុន្តែ ថា ផ្ដល់អទិភាពដល់ពលរដ្ឋដែលត្រូវបានឆ្កែខាំធ្ងន់ធ្ងរ កុមារតូចៗ ព្រះសង្ឈ ជនពិការ មនុស្សចាស់ជរា និងស្រ្តីមានផ្ទៃពោះ៕