ក្រុមប្រទេសលោកសេរី និងអង្គការអន្តរជាតិនានា បានអំពាវដល់លោក នីកូឡាស ម៉ាឌូរ៉ូ បញ្ឈប់រាល់សកម្មភាពទាំងឡាយណា ដែលមានចេតនារាំងខ្ទប់ការផ្ដល់ជំនួយមនុស្សធម៌ដល់ពលរដ្ឋវេណេស៊ុយអេឡា។
ការអំពាវនាវនេះ ធ្វើឡើងបន្ទាប់ពីក្រុមយោធារបស់លោក ម៉ាឌូរ៉ូ បានរារាំងមិនឲ្យក្រុមមនុស្សធម៌យកជំនួយផ្ដល់ឲ្យប្រជាជនវេណេស៊ុយអេឡានៅតាមព្រំដែនជាមួយប្រទេសប្រេស៊ីល និងកូឡុំប៊ី កាលពីថ្ងៃទី២៣ ខែកុម្ភៈ ឆ្នាំ២០១៩។ ការរាំងខ្ទប់របស់ក្រុមយោធានេះ បានបង្កឲ្យមានការប៉ះទង្គិចគ្នាដោយហិង្សាជាមួយក្រុមពលរដ្ឋដែលនៅចាំទទួលយកជំនួយ។ ហេតុការណ៍នេះ បាននាក់បណ្ដាលឲ្យពលរដ្ឋ៤នាក់បាត់បង់ជីវិត ហើយជាង៣០០នាក់ផ្សេងទៀតបានរងបួស។
ក្នុងសេចក្តីថ្លែងការណ៍មួយដែលចេញភ្លាមៗក្រោយការប៉ះទង្គិចគ្នាដោយហិង្សា រដ្ឋាភិបាលកាណាដា បានលើកឡើងថា វាមានរយៈពេលពីរឆ្នាំហើយដែលពិភពលោកបានឃ្លាំមើល និងបង្ហាញក្តីបារម្ភចំពោះការដឹកនាំរបស់លោក ម៉ាឌូរ៉ូ ដែលឈានទៅរករបបផ្ដាច់ការ។ រដ្ឋាភិបាលប្រទេសនេះ បានលើកឡើងទៀតថា ពលរដ្ឋវេណេស៊ុយអេឡាជាច្រើនកំពុងត្រូវការជំនួយយ៉ាងខ្លាំង ហើយមួយចំនួនទៀតបានភៀសខ្លួនចេញពីប្រទេស។ ស្ថានភាពនេះ បង្ហាញកាន់តែច្បាស់ថែមទៀតថា របបរបស់លោក ម៉ាឌូរ៉ូ ត្រូវតែអនុញ្ញាតឲ្យមានការនាំចូលជំនួយមនុស្សធម៌ គ្មានការរារាំងពីសំណាក់កងកម្លាំងណាមួយឡើយ។
សេចក្តីថ្លែងការណ៍ដដែល បន្តថា ប្រទេសកាណាដាមានការព្រួយបារម្ភយ៉ាងខ្លាំងចំពោះសកម្មភាពហិង្សាប្រព្រឹត្តដោយរបបលោក ម៉ាឌូរ៉ូ ដែលត្រូវបានរៀបចំឡើងដើម្បីទប់ស្កាត់ការបញ្ជូនជំនួយសង្គ្រោះពីប្រទេសជិតខាង។ កាណាដា ក៏បានអំពាវនាវឲ្យមានស៊ើបអង្កេតករណីការវាយប្រហារដោយហិង្សាទាំងនោះ ហើយត្រូវនាំជនល្មើសយកទៅជំនុំជម្រះ ។
សហភាពអឺរ៉ុប ក៏បានលើកឡើងស្រដៀងគ្នានឹងប្រទេសកាណាដាផងដែរ។ តាមរយៈសេចក្តីប្រកាសព័ត៌មានដែលចេញផ្សាយកាលពីម្សិលមិញ សហភាពអឺរ៉ុប បានរិះគន់ថា ការបដិសេធមិនឲ្យជំនួយមនុស្សធម៌ចូលក្នុងប្រទេសវេណេស៊ុយអេឡា នឹងធ្វើឲ្យស្ថានការណ៍ក្នុងប្រទេសនេះកាន់តែមានភាពតានតឹងឡើងថែមទៀត។
សហភាពអឺរ៉ុប បានស្នើឲ្យមន្រ្តីអនុវត្តន៍ច្បាប់ និងកងកម្លាំងវេណេស៊ុយអេឡាទាំងអស់ត្រូវរក្សាភាពអត់ធ្មត់ ជៀសវាងការប្រើប្រាស់កម្លាំងណាមួយ ហើយត្រូវអនុញ្ញាតឲ្យជំនួយមនុស្សធម៌ចូលប្រទេសនេះ។
កាលពីម្សិលមិញ អង្គការសហប្រជាជាតិ ក៏បានទទូចឲ្យភាគីពាក់ព័ន្ធទាំងអស់ត្រូវរក្សាភាពស្ងៀមស្ងាត់។ ស្ថាប័នអន្តរជាតិនេះ បានជំរុញឲ្យរដ្ឋាភិបាលរបស់លោក ម៉ាឌូរ៉ូ ត្រូវតែបញ្ឈប់ការប្រើប្រាស់កងកម្លាំងហួសហេតុ ដើម្បីទប់ទល់ជាមួយនឹងក្រុមបាតុករ និងពលរដ្ឋសាមញ្ញដែលគ្មានអាវុធទាល់តែសោះនៅក្នុងដៃ។
គួរបញ្ជាក់ថា ជំនួយមនុស្សធម៌ភាគច្រើនជារបស់សហរដ្ឋអាមេរិក។ លោក ម៉ាឌូរ៉ូ បានដិសេធជំនួយទាំងនោះតាំងពីដំបូង ដោយថា អាមេរិកនឹងប្រើលេសក្នុងការផ្ដល់ជំនួយនេះ ដើម្បីឈ្លានពានប្រទេសវេណេស៊ុយអេឡា។ លោក ម៉ាឌូរ៉ូ បានដាក់កម្លាំងជាច្រើននៅតាមបណ្ដោយព្រំដែនជាមួយប្រេស៊ីល និងកូឡុំប៊ី ដើម្បីរារាំងការចែកជំនួយដល់ប្រជាជនវេណេស៊ុយអេឡា៕