ដីព្រៃឈើទំហំ ២៤០ហិកតា ត្រូវបានរដ្ឋាភិបាលសម្រេចកាត់ចេញពីដែនជម្រកសត្វព្រៃ ២កន្លែងនៅក្នុងខេត្តមណ្ឌលគិរី ហើយប្រគល់ទៅឲ្យគ្រួសារកងទ័ព និងនគរបាលឈរជើងការពារតាមបណ្ដោយព្រំដែនកម្ពុជា-វៀតណាម។ នេះបើតាមសៀវភៅព្រះរាជកិច្ច។
ក្នុងអនុក្រឹត្យចុះថ្ងៃទី២៧ ខែវិច្ឆិកា ឆ្នាំ២០១៨ លោកនាយករដ្ឋមន្ត្រី ហ៊ុន សែន ឲ្យដឹងថា ការកាត់ផ្ទៃដីសរុបទំហំ ២៤០ហិកតា ស្ថិតនៅឃុំដាក់ដាំស្រុកអូររាំង ឃុំក្រង់តេះ នៃស្រុកពេជ្រាដា និងឃុំស្រែហ៊ុយ ស្រុកកោះញែក ខេត្តមណ្ឌលគិរី ចេញពីដែនជម្រកសត្វព្រៃណាំលៀ និងដែនជម្រសត្វព្រៃស្រែពក ដើម្បីធ្វើអនុបយោគជាដីឯកជនរបស់រដ្ឋ។
អនុក្រឹត្យបញ្ជាក់បន្ថែមថា រដ្ឋាភិបាលបានសម្រេចធ្វើសម្បទានដីទំហំ ២៤០ហិកតានេះ ទៅឲ្យគ្រួសារកងទ័ព និងនគរបាលជាតិដែលឈរជើងការពារតាមបណ្ដោយព្រំដែនកម្ពុជា-វៀតណាម ក្នុងភូមិសាស្ត្រខេត្តមណ្ឌលគិរី។
ដីព្រៃឈើទំហំជាង ២ម៉ឺនហិកតា (២១,៩៣៣) ស្ថិតនៅតំបន់ភ្នំណាំលៀ ត្រូវបានរដ្ឋាភិបាលកំណត់ជាដែនការពារជម្រកសត្វព្រៃកាលពីឆ្នាំ២០១៦ ដោយស្ថិតនៅក្រោមការគ្រប់គ្រងរបស់ក្រសួងបរិស្ថាន ខណៈដែលដីព្រៃទំហំជាង ៣សែន ៧ម៉ឺនហិកតា (៣៧២,៩៧១) ដែលគ្របដណ្ដប់លើស្រុកកោះញែក ស្រុកកែវសីមា ក្រុងសែនមនោរម្យ និងស្រុកអូររាំង ខេត្តមណ្ឌលគិរី ក៏ត្រូវបានដាក់ជាតំបន់ការពារដែនជម្រកសត្វព្រៃកាលពីឆ្នាំ២០១៦ផងដែរ៕