ប្រធានាធិបតីវៀតណាម ដែលមានតួនាទីជាអគ្គលេខាធិការគណបក្សកុម្មុយនីស្ដវៀតណាមផងនោះ បានចាប់ផ្ដើមដំណើរទស្សនកិច្ចនៅប្រទេសកម្ពុជាហើយនៅល្ងាចថ្ងៃចន្ទនេះ ដែលជាផ្នែកមួយនៃដំណើរការទស្សនកិច្ចផ្លូវរដ្ឋរយៈពេល ២ថ្ងៃនៅកម្ពុជា។
បើតាមសេចក្ដីប្រកាសព័ត៌មានក្រសួងការបរទេសកម្ពុជា ប្រធានរដ្ឋវៀតណាម លោក NGUYEN PHU TRONG ត្រូវដឹកនាំគណៈប្រតិភូវៀតណាមមកទស្សនកិច្ចផ្លូវរដ្ឋនៅកម្ពុជា សម្រាប់រយៈពេល ២ថ្ងៃ ចាប់ពីថ្ងៃទី២៥ រហូដល់ថ្ងៃទី២៦កុម្ភៈនេះ។
សម្រាប់ថ្ងៃដំបូងនៃដំណើរទស្សនកិច្ចនេះ លោក NGUYEN PHU TRONG នឹងចូលគាល់ព្រះមហាក្សត្រខ្មែរ ព្រះករុណា ព្រះបាទសម្ដេចព្រះបរមនាថ សីហមុនី និងសម្ដេចម៉ែ ព្រះមហាក្សត្រី នរោត្តម មុនីនាថ សីហនុនៅឯព្រះបរមរាជវាំង។
បើតាមរៀបវារៈ សម្រាប់ថ្ងៃទី២នៃដំណើរទស្សនកិច្ចនេះ ប្រធានរដ្ឋវៀតណាម លោក NGUYEN PHU TRONG នឹងជួបជាមួយសម្ដេចសង្ឃទាំងពីរគណៈ គឺសម្ដេចសង្ឃ ទេព វង្ស និងសម្ដេចសង្ឃ បួរ គ្រី ដែលជាសម្ដេចព្រះសង្ឃរាជនៃគណៈធម្មយុត្តិកនិកាយ។ បន្ទាប់ពីនេះ លោកក៏នឹងជួបជាមួយប្រធានព្រឹទ្ធសភាកម្ពុជា លោក សាយ ឈុំ ប្រធានរដ្ឋសភា លោក ហេង សំរិន និងលោកនាយករដ្ឋមន្ដ្រី ហ៊ុន សែន ផងដែរ។
ដំណើរទស្សនកិច្ចផ្លូវរដ្ឋមកប្រទេសកម្ពុជារបស់ប្រធានរដ្ឋវៀតណាម គឺធ្វើឡើងនៅមុនពេលជំនួបជាលើកទី២ រវាងប្រធានាធិបតីអាមេរិក លោក ដូណាល់ ត្រាំ និងមេដឹកនាំកូរ៉េខាងជើង លោក គីម ជុងអ៊ុន ដែលគ្រោងធ្វើឡើងនៅប្រទេសវៀតណាម នាថ្ងៃទី២៧ និងថ្ងៃទី២៨ ខែកុម្ភៈខាងមុខនេះ៕
