ប្រទេសវៀតណាម បានចាប់យកឱកាសនៃជំនួបជាលើកទី២រវាងលោក ដូណាល់ ត្រាំ និង លោក គីម ជុងអ៊ុន ដើម្បីផ្សព្វផ្សាយពីម្ហូបអាហារ និងតំបន់ទេសចរណ៍របស់ខ្លួន។
អនុរដ្ឋមន្រ្តីក្រសួងការបរទេសវៀតណាម លោក Le Hoai Trung កាលពីថ្ងៃទី២៤ ខែកុម្ភៈ ឆ្នាំ ២០១៩ បានថ្លែងក្នុងសន្និសីទសារព័ត៌មានស្តីពីការរៀបចំជំនួបកំពូលរវាងមេដឹកនាំអាមេរិក និងកូរ៉េខាងជើង ថា នាយករដ្ឋមន្រ្តីខ្លួនបានផ្តែផ្ដាំឲ្យរៀបចំ ហ្វឺ ណែម និងម្ហួបអាហារប្រពៃណីរបស់វៀតណាមមួយចំនួនទៀត សម្រាប់ទទួលក្រុមអ្នកយកព័ត៌មាន ដើម្បីផ្សព្វផ្សាយឲ្យពិភពលោកបានស្គាល់។ អ្នកឆ្លើយឆ្លងទីភ្នាក់ងារសារព័ត៌មានរ៉យទ័រម្នាក់ប្រចាំប្រទេសវៀតណាម បានសរសេរលើTwitter របស់ខ្លួន ថារដ្ឋមន្រ្តីក្រសួងព័ត៌មានប្រទេសកុម្មុយនីស្តមួយនេះ ក៏បានប្រាប់ដល់ក្រុមអ្នកសារព័ត៌មានឲ្យចាត់ទុកក្រសួងដូចជាសមាជិកក្រុមគ្រួសារតែមួយជាមួយគ្នាផងដែរ។
តាមការចុះផ្សាយរបស់សារព័ត៌មាន South China Morning Post កាលពីម្សិលមិញ វៀតណាម បានរៀបចំជាប៊ូហ្វេ ដែលមានមុខម្ហូបវៀតណាមជាច្រើនមុខសម្រាប់ទទួលក្រុមអ្នកយកព័ត៌មាន។
អ្នកជំនាញផ្នែកទេសចរ បានលើកឡើងថា រដ្ឋាភិបាលវៀតណាមបានដឹងពីឱកាសដ៏ធំក្នុងការធ្វើទីផ្សារទេសចរណ៍ដែលផ្តល់ឲ្យតាមរយៈវត្តមានរបស់អ្នកកាសែតជាច្រើនពាន់នាក់មកពីស្ថាប័នសារព័ត៌មានអន្តរជាតិនានា។
អ្នកឯកទេសប្រឹក្សាយោបល់ផ្នែកទេសចរណ៍វៀតណាម លោក Mark Gwyther បានថ្លែងប្រាប់សារព័ត៌មាន South China Morning Post ថាព្រឹត្តិការណ៍ជំនួបកំពូលរវាងអាមេរិក និងកូរ៉េខាងជើងនេះ នឹងជួយដល់ទីផ្សារទេសចរណ៍វៀតណាមច្រើនជាងសកម្មភាពនានាដែលវៀតណាមបានធ្វើកន្លងមកក្នុងប្រវត្តិសាស្រ្តរបស់គេ ដើម្បីផ្សព្វផ្សាយពីវិស័យនេះ។
ប្រភពដដែលឲ្យដឹងថា រដ្ឋាភិបាលវៀតណាមក៏នឹងរៀបចំដំណើរកំសាន្តដោយឥតគិតថ្លៃឲ្យក្រុមអ្នកសារព័ត៌មានទៅកាន់ឆ្នេរហាឡុង និងតំបន់ទេសចរណ៍នៅភាគខាងជើងប្រទេសនេះមួយចំនួនទៀតផងដែរ។
ប្រធានាធិបតីសហរដ្ឋអាមេរិក លោក ដូណាល់ ត្រាំ និង មេដឹកនាំកូរ៉េខាងជើង លោក គីម ជុងអ៊ុន កំពុងស្ថិតក្នុងទីក្រុងហាណូយ ប្រទេសវៀតណាម ដើម្បីជួបជជែកគ្នាជាលើកទីពីរជុំវិញបញ្ហានុយក្លេអ៊ែរបស់កូរ៉េខាងជើង៕
