នគរបាលរាជធានីភ្នំពេញ អះអាងថា នរគរបាលរាជធានីភ្នំពេញ បានរកឃើញក្លឹបកម្សាន្ត និងបារបារាំងជិត ១៣០០កន្លែង បានប្រើប្រាស់គ្រឿងញៀន ក្នុងនោះក្លឹបជាង ១ពាន់កន្លែង បានធ្វើកិច្ចសន្យាដើម្បីបញ្ឈប់ការប្រើប្រាស់ និងចែកចាយគ្រឿងញៀនរួចហើយ។
គេហទំព័រនគរបាលជាតិ បានចុះផ្សាយនៅថ្ងៃនេះថា នៅក្នុងសន្និបាតបូកសរុបការងារប្រចាំឆ្នាំរបស់នគរបាលរាជធានីភ្នំពេញនៅថ្ងៃនេះ មន្ត្រីនគរបាលទទួលបន្ទុកបង្ក្រាបគ្រឿងញៀន បានស្រាវជ្រាវ និងរកឃើញក្លឹបកម្សាន្ត និងបារបារាំងដល់ទៅ ១២៩៥កន្លែង មានជាប់ពាក់ព័ន្ធនឹងការប្រើប្រាស់ថ្នាំញៀន។
គេហទំព័រនគរបាលជាតិដដែលនេះ បានចុះផ្សាយបន្តថា ក្លឹបកម្សាន្ត និងបារបារាំងជាង ១០០០កន្លែង បានសន្យាបញ្ឈប់សកម្មភាពពាក់ព័ន្ធនឹងបទល្មើសគ្រឿងញៀនកាលពីឆ្នាំ២០១៨កន្លងមកនេះ។
ប្រភពដដែល បានឲ្យដឹងទៀតថា ការបង្ក្រាបគ្រឿងញៀនខុសច្បាប់លើកទី៣ បង្ក្រាបបាន ២០២៤ករណី ឃាត់ខ្លួនបាន ៣៦៧០នាក់ និងបានកសាងសំណុំរឿងបញ្ជូនទៅសាលាដំបូងរាជធានីភ្នំពេញ។
ទោះបីជានគរបាលរាជធានីភ្នំពេញ បានបង្ហាញតួលេខបែបនេះក្ដី មានតែមជ្ឈមណ្ឌលកម្សាន្តរ៉ក់តែមួយគត់ ត្រូវបានបង្ក្រាបកាលពីសប្ដាហ៍មុន ហើយបានឃាត់ខ្លួនមនុស្សដល់ទៅជាង ៣០០នាក់ និងរឹបអូសបានគ្រឿងញៀនប្រហែល ៥០គីឡូក្រាមរហូតមកដល់ពេលនេះ។
ទោះជាយ៉ាងណា ឧកញ៉ា គិត ធាង ដែលជាម្ចាស់មជ្ឈមណ្ឌលកម្សាន្តមួយនេះ មិនទាន់ត្រូវបានសមត្ថកិច្ចមានវិធានការទៅលើនោះឡើយ ចាប់តាំងពីក្រោយការបង្ក្រាបកាលពីសប្ដាហ៍មុនមក៕