ពលរដ្ឋខ្មែរជិត ៣០នាក់ ក្នុងនោះភាគច្រើនជាកុមារ ត្រូវបានអាជ្ញាធរវៀតណាមចាប់បញ្ជូនមកប្រទេសកំណើតវិញកាលពីថ្ងៃម្សិលមិញនេះ ក្រោយឆ្លងដែនខុសច្បាប់ចូលទៅវៀតណាម។ នេះបើតាមអគ្គនាយកដ្ឋានអន្តោប្រវេសន៍កម្ពុជា។
អគ្គនាយកដ្ឋានអន្តោប្រវេសន៍ បានរៀបរាប់លើទំព័រហ្វេសប៊ុករបស់ខ្លួនថា កាលពីម្សិលមិញ កម្លាំងស្នងការដ្ឋាននគរបាលខេត្តស្វាយរៀងបានទទួលពលរដ្ឋខ្មែរ ២៧នាក់ ដែលឆ្លងដែនខុសច្បាប់ពីភាគីវៀតណាមតាមច្រកទ្វារអន្តរជាតិបាវិតចំនួន ១៨គ្រួសារ មាន ២៧នាក់ក្នុងនោះមានកុមារ ១៥នាក់។
អគ្គនាយកដ្ឋានអន្តោប្រវេសន៍ បានអះអាងថា ពលរដ្ឋខ្មែរទាំង ២៧នាក់នោះ ត្រូវបានអនុញ្ញាតឲ្យត្រឡប់ទៅផ្ទះវិញ ក្រោយសមត្ថកិច្ចបានធ្វើការអប់រំរួចមក។
កាលពីខែមេសា ឆ្នាំ២០១៨កន្លងទៅ វៀតណាមក៏បានបញ្ជូនពលរដ្ឋខ្មែរ ១៤នាក់ដែលឆ្លងដែនខុសច្បាប់ត្រឡប់មកប្រទេសកម្ពុជាវិញផងដែរ ដែលក្នុងនោះមាន ១១នាក់ជាកុមារ៕
