ជំនួបកំពូលជាលើកទី២ រវាងប្រធានាធិបតីសហរដ្ឋអាមេរិក និងប្រមុខរដ្ឋកូរ៉េខាងជើងត្រូវបានបញ្ចប់ទៅមុនពេលកំណត់ ដោយមិនមានកិច្ចព្រមព្រៀងណាមួយកើតឡើងនោះឡើយ។
លោក ដូណាល់ ត្រាំ បានលើកឡើងជាមួយក្រុមអ្នកសារព័ត៌មានថា ជំនួបរវាងលោក និងលោក គីម ជុងអ៊ុន ត្រូវបានបញ្ចប់មុនពេលកំណត់ ដោយសារតែភាគីទាំងពីរមានការខ្វែងគំនិតគ្នាជុំវិញបញ្ហាទណ្ឌកម្មលើកូរ៉េខាងជើង។ តាមការចុះផ្សាយរបស់សារព័ត៌មាន CNBC លោក ត្រាំ បានលើកឡើងថា មេដឹកនាំកូរ៉េខាងជើងស្នើឲ្យអាមេរិកលុបចោលទណ្ឌកម្មទាំងអស់ប្រឆាំងខ្លួន ប៉ុន្តែអាមេរិកមិនអាចធ្វើបាននោះទេ។ លោក ត្រាំ បន្ថែមថា លោក គីម ថានឹងបិទរោងចក្រផលិតសព្វាវុធមួយកន្លែងជាការដោះដូរនឹងការលើកលែងទណ្ឌកម្ម តែលោកថា អាមេរិកចង់បានលើសពីនេះ។
ទោះយ៉ាងណាក៏ដោយលោក ត្រាំ នៅតែមានសុទិដ្ឋិនិយមថា នឹងមានជំនួបជាលើកទី៣ រវាងលោក និងលោក គីម ដើម្បីដោះស្រាយបញ្ហាវិបត្តិនុយក្លេអ៊ែនៅឧបទ្វីបកូរ៉េ។ មុនកិច្ចប្រជុំលោក ត្រាំ បានបង្ហាញក្តីសង្ឃឹមខ្ពស់ថា ជំនួបជាលើកទី២នៅទីក្រុងហាណូយនេះ នឹងទទួលបានផលជាវិជ្ជមាន ពោលគឺការបោះបង់ចោលកម្មវិធីអាវុធនុយក្លេអ៊ែពីសំណាក់កូរ៉េខាងជើង៕