រដ្ឋាភិបាលកម្ពុជា ជំរុញឲ្យប្រទេសឥណ្ឌា និងប៉ាគីស្ថាន រក្សាការអត់ធ្មត់ខ្ពស់បំផុត ហើយធ្វើការដោះស្រាយទំនាស់នៅតំបន់កាស្មៀរដោយសន្តិវិធី។
ការអំពាវនាវរបស់រដ្ឋាភិបាលកម្ពុជា ធ្វើឡើង ស្របពេលដែលឥណ្ឌា និងប៉ាគីស្ថាន ប៉ះទង្គិចគ្នាជាថ្មីជុំវិញបញ្ហាទឹកដីកាស្មៀរ ដែលឈានរហូតដល់ការបាញ់ទម្លាក់យន្តហោះចម្បាំងគ្នាទៅវិញទៅមក។
ក្នុងសេចក្តីថ្លែងការរបស់ក្រសួងការបរទេស និងសហប្រតិបត្តិការអន្តរជាតិ ដែលចេញផ្សាយកាលពីម្សិលមិញ កម្ពុជាបានលើកឡើងថា ក្នុងឋានៈជាមិត្តនៃប្រទេសទាំងពីរ កម្ពុជាសង្ឃឹមថាប្រទេសប៉ាគីស្ថាន និងឥណ្ឌា រក្សាការធ្មត់ខ្ពស់បំផុត ដើម្បីជៀសវាងការប៉ះទង្គិចគ្នាដោយអាវុធបន្តថែមទៀត ដែលនាំឲ្យមានអរិភាពក្នុងចំណោមប្រជាជនប្រទេសទាំងពីរ។
សេចក្តីថ្លែងការណ៍ដដែល បន្តថា៖ «កម្ពុជាជឿជាក់ថា ប្រទេសប៉ាគីស្ថាន និងឥណ្ឌា អាចធ្វើការចរចាគ្នា ដើម្បីកាត់បន្ថយភាពតានតឹងនាពេលបច្ចុប្បន្ន និងស្វែងរកដំណោះស្រាយទំនាស់តាមមធ្យោបាយសន្តិវិធី»។
វិបត្តិទឹកដីកាស្មៀរ មិនមែនជារឿងថ្មីនោះទេ។ វាបានអូសបន្លាយរយៈពេល៧២ឆ្នាំមកហើយ។
ភាពតានតឹងជាថ្មីរវាងឥណ្ឌា និងប៉ាគីស្ថាន ជុំវិញបញ្ហាទឹកដីកាស្មៀរក្នុងរយៈពេលពីរសប្តាហ៍ចុងក្រោយនេះ ផ្ដើមចេញពីការវាយប្រហារដោយគ្រាប់បែកអត្តឃាតទៅលើកងទ័ពឥណ្ឌាកាលពីថ្ងៃទី១៤ ខែកុម្ភៈ ឆ្នាំ២០១៩។ ការវាយប្រហារនេះ បានបណ្ដាលឲ្យកងទ័ពឥណ្ឌាដែលឈរជើងនៅតំបន់ Pulwama ៤០នាក់បានបាត់ជីវិត។ ក្រុមយោធាដែលមានមូលដ្ឋាននៅប៉ាគីស្ថាន ឈ្មោះថា Jaish-e-Mohammed បានប្រកាសទទួលខុសត្រូវលើការវាយប្រហារនេះ។
ឥណ្ឌា បានបើកការវាយប្រហារតាមផ្លូវអាកាសទៅលើជំរុំយោធាមួយចំនួនដែលបោះនៅលើទឹកដីប៉ាគីស្ថាន កាលពីថ្ងៃទី២៦ ខែកុម្ភៈ ឆ្នាំ២០១៩។ រដ្ឋាភិបាលឥណ្ឌា បានលើកឡើងថា ការវាយប្រហារដែលខ្លួនធ្វើឡើងទៅលើក្រុមយោធាក្នុងទឹកដីប៉ាគីស្ថាន ជាការប្រឆាំងនឹងក្រុមភេរវករ។
ជាការឆ្លើយតបយោធាប៉ាគីស្ថាន កាលពីថ្ងៃទី២៧ ខែកុម្ភៈ ឆ្នាំ២០១៩ បានបាញ់ទម្លាក់យន្តហោះចម្បាំងរបស់ឥណ្ឌាពីរគ្រឿង និងចាប់ខ្លួនអ្នកបើកយន្តហោះចម្បាំងរបស់ឥណ្ឌាម្នាក់។ ក្រុមយោធាឥណ្ឌា ក៏បានអះអាងថា ភាគីខ្លួន ក៏បានបាញ់ទម្លាក់យន្តហោះចម្បាំងរបស់ប៉ាគីស្ថានមួយវិញផងដែរ។
តាមការចុះផ្សាយរបស់សាព័ត៌មាន BBC ប្រទេសប៉ាគីស្ថាន នឹងដោះលែងអ្នកបើកយន្តហោះចម្បាំងឥណ្ឌា នៅថ្ងៃសុក្រនេះ៕
