អាជ្ញាធរជាតិអប្សរាជូនដំណឹងទៅស្ថាប័នជាតិ និងអន្តរជាតិ ជួយណែនាំភ្ញៀវទេសចរទាំងអស់កុំឲ្យបរិភោគអាហារក្នុងបរិវេណប្រាសាទ អំឡុងពេលចូលទស្សនាប្រាសាទអង្គរវត្ត និងបាយ័ន ដោយថា ប្រាសាទទាំងពីរនេះ ជាទីគោរពសក្ការៈដ៏ស័ក្តិសិទ្ធិ និងជាដួងព្រលឹងរបស់ជាតិខ្មែរទាំងមូល។
លិខិតជូនដំណឹងរបស់អាជ្ញាធរជាតិអប្សរាចេញផ្សាយកាលពីថ្ងៃទី២៨ ខែកុម្ភៈ ឲ្យដឹងថា ស្ថាប័នជាតិ និងអន្តរជាតិ អាជ្ញាធរដែនដី មន្ទីរ-អង្គភាព សមាគម ទីភ្នាក់ងារទេសចរណ៍ សមាគមមគ្គុទ្ទេសទេសចរណ៍ មគ្គុទ្ទេសទេសចរណ៍ ក្រុមហ៊ុន រួមទាំងអ្នកដឹកជញ្ជូនភ្ញៀវ និងអាជីវករ ជួយណែនាំភ្ញៀវទេសចរកុំឲ្យបរិភោគក្នុងបរិវេណប្រាសាទ អំឡុងពេលចូលទស្សនាប្រាសាទនាពេលថ្ងៃរះ ឬថ្ងៃលិច។
អាជ្ញាធរអប្សរា ថា ការហាមប្រាមនេះ ធ្វើឡើងដើម្បីថែរក្សាការពារនូវតម្លៃដ៏វិសេសវិសាលនៃមរតកដូនតាខ្មែរ និងរក្សានូវរបៀបរៀបរយ សណ្ដាប់ធ្នាប់ អនាម័យក្នុងបរិវេណប្រាសាទ ខណៈតំបន់រមណីយដ្ឋានអង្គរ គឺជារមណីយដ្ឋាននៃបេតិកភណ្ឌពិភពលោកដែលមានប្រាង្គប្រាសាទដ៏ល្បីល្បាញជាច្រើន ជាពិសេសប្រាសាទអង្គរវត្ត និងបា្រសាសាទបាយ័ន ដែលជាទីគោរពសក្ការៈដ៏ស័ក្តិសិទ្ធិ និងជាដួងព្រលឹងរបស់ជាតិខ្មែរទាំងមូល។
អាជ្ញាធរជាតិអប្សរា បញ្ជាក់ថា នឹងធ្វើការហាមឃាត់មិនឲ្យភ្ញៀវទេសចរវេចខ្ចប់អាហារចូលទៅទស្សនាប្រាសាទ ទាំងអំឡុងពេលទិញបណ្ណ និងពេលពិនិត្យបណ្ណចូលទស្សនា៕
