វៀតណាមនៅតែទទួលបានផលប្រយោជន៍ច្រើនជាងគេលើផ្នែកនយោបាយអន្តរជាតិ និង សេដ្ឋកិច្ច បើទោះជាជំនួបរវាងមេដឹកនាំសហរដ្ឋអាមេរិក និង មេដឹកនាំកូរ៉េខាងជើងនៅទីក្រុងហាណូយបរាជ័យក៏ដោយ។
ជំនួបកំពូលរវាងលោក លោក ដូណាល់ ត្រាំ និង លោក គីម ជុងអ៊ុន នៅថ្ងៃទី២៧ដល់ថ្ងៃទី២៨ខែកុម្ភៈនោះ បានបញ្ចប់ដោយភាពអួរអាប់មិនបានផលដូចការរំពឹងទុកនោះទេ។
ជំនួបលើកទី២នៅវៀតណាមនេះគឺដើម្បីតាមដានលទ្ធផលការអនុវត្តកិច្ចព្រមព្រៀងកាលពីថ្ងៃទី១២ខែមិថុនាឆ្នាំ២០១៨ ក្នុងដំណើរការរំសាយអាវុធនុយក្លេអ៊ែរបស់កូរ៉េខាងជើង។ ប៉ុន្តែជំនួបនៅវៀតណាមនេះមិនទទួលផលទេដោយសារលោក គីម ជុងអ៊ុនទាមទារឲ្យអាមេរិកទម្លាក់ចោលរាល់ទណ្ឌកម្មទាំងអស់មុនដំណើររំសាយកម្មវិធីអាវុធនុយក្លេអ៊ែ ប៉ុន្តែសំណើនេះត្រូវលោកដូណាល់ ត្រាំបញ្ជាក់ថា មិនអាចធ្វើទៅបានទេគឺត្រូវរំសាយចោលកម្មវិធីអាវុធនុយក្លេអ៊ែជាមុនសិន។
ភាគីទាំងពីរបានលុបចោលកម្មវិធីអាហារថ្ងៃត្រង់ និងការចុះហត្ថលេខារួមគ្នា នៅថ្ងៃទី២៨ខែកុម្ភៈគឺស្ថានភាពអាប់អូរមិនដូចកាលជំនួបលើកទី១នៅសិង្ហបុរីនោះទេ។
បើទោះជាម្ចាស់កម្មវិធីអាមេរិក និងកូរ៉េខាងជើងបរាជ័យ ប៉ុន្តែម្ចាស់ផ្ទះគឺវៀតណាមនៅតែទទួលបានផលច្រើនលើសលប់។
អ្វីខ្លះជាជោគជ័យរបស់វៀតណាម?
កេរ្តិ៍ឈ្មោះលើឆាកអន្តរជាតិ
វៀតណាមអាចបង្ហាញឥទ្ធិពលរបស់ខ្លួនលើឆាកអន្តរជាតិគឺខ្លួនជាប្រទេសកុម្មុយនីស្តអាចដើរតួនាទីជាអ្នកសម្របសម្រួលរៀបចំឲ្យមេដឹកនាំប្រទេសសេរី និង មេដឹកនាំផ្តាច់ការលើពិភពលោកជួបគ្នា។ ជំនួបនេះមានការចាប់អារម្មណ៍ខ្លាំងដោយសារតែវាពាក់ព័ន្ធសន្តិសុខនៅក្នុងតំបន់និងពិភពលោក។
លោក ដូណាល់ ត្រាំ បានថ្លែងប្រាប់អ្នកសារព័ត៌មាន និង បានសរសេរលើបណ្តាញសង្គមរបស់លោក ទាំងTwitters និង Facebook ដោយបានអរគុណថ្នាក់ដឹកនាំ និងប្រជាជនវៀតណាមថា បានរៀបចំពិធីទទួលលោកដោយកក់ក្តៅ។
ប្រយោជន៍សេដ្ឋកិច្ច
នាយករដ្ឋមន្ត្រីវៀតណាម លោក ង្វ្រៀន សួនហ្វុក ថ្លែងថា ជំនួបលោក គីម និង លោក ត្រាំ បង្ហាញថា វៀតណាមជាប្រទេសមានសន្តិសុខ និងសន្តិភាពរឹងមាំពិតប្រាកដ ដែលផ្តល់ទំនុកចិត្តដល់អ្នកវិនិយោគ និងភ្ញៀវទេសចរ។
បើទោះជាជំនួបនេះអាមេរិក និងកូរ៉េខាងជើង មិនទទួលបានជោគជ័យ ប៉ុន្តែវៀតណាមបានប្រឹងប្រែងអស់លទ្ធភាពក្នុងការរៀបចំជាម្ចាស់ផ្ទះ ហើយដំណើរការតាំងពីចាប់ផ្តើមរហូតដល់ចប់មិនមានបញ្ហាអសន្តិសុខណាមួយកើតឡើងនោះទេ។
មេដឹកនាំវៀតណាមបានជួបដាច់ដោយឡែកជាមួយមេដឹកនាំ អាមេរិក និង មេដឹកនាំកូរ៉េខាងជើង ហើយបានចុះហត្ថលេខាលើកិច្ចព្រមព្រៀងពាណិជ្ជកម្មមួយចំនួន។
ក្រុមហ៊ុនអាកាសចរណ៍ និងក្រសួងទេសចរណ៍វៀតណាមបានផ្តល់សំបុត្រយន្តហោះ និង កន្លែងស្នាក់នៅសណ្ឋាគារលំដាប់ផ្កាយ៥សម្រាប់អ្នកសារព័ត៌មាន៣០០០នាក់ ដែលយកព័ត៌មានក្នុងជំនួបកំពូលនេះ អាចដើរកំសាន្តក្នុងប្រទេសវៀតណាម២ថ្ងៃ។
សកម្មភាពនេះអាចជួយផ្សព្វផ្សាយតំបន់ទេសចរណ៍របស់ប្រទេសនេះបានកាន់តែច្រើន ខណៈវៀតណាមរំពឹងថា ភ្ញៀវទេសចរនៅឆ្នាំ២០១៩នេះនឹងកើនដល់ជាង១៨លាននាក់ គឺកើនឡើង២០ភាគរយប្រៀបធៀបឆ្នាំ២០១៨។