មន្រ្តីជាន់ខ្ពស់ប្រទេសរុស្ស៊ី បានបញ្ជាក់ប្រាប់សហរដ្ឋអាមេរិកថា ប្រទេសខ្លួនបានត្រៀមរួចហើយដើម្បីជួបពិភាក្សាបញ្ហាដែលកំពុងកើតមាននៅក្នុងប្រទេសវេណេស៊ុយអេឡា។
រដ្ឋមន្រ្តីក្រសួងការបរទេសរុស្ស៊ី លោក Sergei Lavrov បានថ្លែងប្រាប់រដ្ឋមន្រ្តីក្រសួងការបរទេសអាមេរិក លោក Mike Pompeo បែបនេះ ក្នុងពេលដែលមេដឹកនាំប្រទេសមហាអំណាចទាំងពីរជួបសន្ទនាគ្នាតាមទូរសព្ទកាលពីថ្ងៃទី២ ខែមីនា ឆ្នាំ២០១៩។
តាមសេចក្តីប្រកាសព័ត៌មានរបស់ក្រសួងការបរទេសរុស្ស៊ីដែលចេញភ្លាមៗក្រោយការសន្ទនាគ្នាតាមទូរសព្ទរវាងមេដឹកនាំប្រទេសទាំងពីរបានបញ្ចប់ ភាគីរុស្សីបានឲ្យដឹងថា ប្រទេសខ្លួនស្វាគមន៍សំណើរបស់សហរដ្ឋអាមេរិកដែលចង់ឲ្យមានជំនួបទ្វេរភាគី ដើម្បីជជែកពីស្ថានការណ៍កំពុងកើតឡើងនៅក្នុងប្រទេសវេណេស៊ុយអេឡា។ ទោះយ៉ាងណាក៏ដោយ រុស្ស៊ី បានបញ្ជាក់ប្រាប់អាមេរិកថាការពិភាក្សាត្រូវធ្វើឡើងឲ្យស្របតាមធម្មនុញ្ញអង្គការសហប្រជាជាតិ ហើយមានតែជនជាតិវេណេស៊ុយអេឡាទើបមានសិទ្ធិសម្រេចជោគវាសនារបស់វេណេស៊ុយអេឡា។
ក្នុងសេចក្តីប្រកាសព័ត៌មានដដែល រុស្ស៊ី ក៏បានវាយប្រហារធ្ងន់ៗទៅលើសហរដ្ឋអាមេរិកផងដែរ។ រដ្ឋមន្រ្តីក្រសួងការបរទេសរុស្ស៊ី លោក Sergei Lavrov បានថ្កោលទោសចំពោះការគំរាមកំហែងដែលអាមេរិកបានធ្វើចំពោះអ្នកដឹកនាំស្របច្បាប់របស់ប្រទេសវេណេស៊ុយអេឡា។ មេដឹកនាំស្របច្បាប់ដែលរុស្ស៊ី សំដៅដល់នៅពេលនេះគឺលោក នីកូឡាស ម៉ាឌូរ៉ូ។
រដ្ឋមន្រ្តីក្រសួងការបរទេសរុស្ស៊ីរូបនេះ ហៅសកម្មភាពរបស់អាមេរិកថា ជាការជ្រៀតជ្រែកហួសហេតុក្នុងកិច្ចការផ្ទៃក្នុងនៃរដ្ឋអធិបតេយ្យមួយ ហើយក៏ជាការរំលោភបំពានយ៉ាងធ្ងន់ធ្ងរលើច្បាប់អន្តរជាតិផងដែរ។ លោក Sergei Lavrov លើកឡើងទៀតថា ការផ្ដល់ជំនួយមនុស្សធម៌គឺបង្កប់ដោយការញុះញង់ និងការជ្រៀតជ្រែកលើកិច្ចការផ្ទៃក្នុងវេណេស៊ុយអេឡា ហើយវាមិនបានជួយអ្វីសោះដល់ដំណើរការប្រជាធិបតេយ្យនៅប្រទេសនេះ។
សហរដ្ឋអាមេរិក ជាប្រទេសដែលចេញមុខមុនគេក្នុងការផ្ដល់ជំនួយមនុស្សធម៌ទៅដល់ប្រជាជនវេណេស៊ុយអេឡា។ លោក ម៉ាឌូរ៉ូ បានបដិសេធជំនួយទាំងនោះតាំងពីដំបូង ដោយថា អាមេរិកនឹងប្រើលេសក្នុងការផ្ដល់ជំនួយនេះ ដើម្បីឈ្លានពានប្រទេសវេណេស៊ុយអេឡា។
ជាក់ស្តែងកាលពីថ្ងៃទី២៣ ខែកុម្ភៈ ឆ្នាំ២០១៩ កម្លាំងដែលគាំទ្រលោក ម៉ាឌូរ៉ូ បានរារាំងមិនឲ្យក្រុមមនុស្សធម៌យកជំនួយផ្ដល់ឲ្យប្រជាជនវេណេស៊ុយអេឡានៅតាមព្រំដែនជាមួយប្រទេសប្រេស៊ីល និងកូឡុំប៊ី រហូតដល់មានការប៉ះទង្គិចគ្នាបណ្ដាលឲ្យពលរដ្ឋ៤នាក់បាត់បង់ជីវិត ហើយជាង៣០០នាក់ផ្សេងទៀតបានរងបួស។
ជាការឆ្លើយតបនឹងការរារាំងមិនឲ្យជំនួយរបស់ខ្លួនចូលទឹកដីវេណេស៊ុយអេឡា រតនាជាតិអាមេរិកកាលពីថ្ងៃទី១ ខែមីនា ឆ្នាំ២០១៩ បានសម្រេចដាក់ទណ្ឌកម្មប្រឆាំងនឹងក្រុមមេដឹកនាំកងកម្លាំងដែលស្មោះស្ម័គ្រនឹងលោក ម៉ាឌូរ៉ូ ចំនួន៦នាក់។ មនុស្សទាំង៦នាក់នោះ ត្រូវបានអាមេរិកចោទថាជាអ្នកទទួលខុសត្រូវក្នុងការរារាំងមិនអោយជំនួយមនុស្សធម៌ដែលពលរដ្ឋវេណេស៊ុយអេឡា កំពុងត្រូវការជាចាំបាច់។ ពួកគេទាំង៦នាក់នោះ ត្រូវបានអាមេរិកបង្កកទ្រព្យសម្បត្តិ ហើយទណ្ឌកម្មនេះក៏រារាំងពួកគេមិនឲ្យធ្វើការរកស៊ីណាមួយជាមួយជនជាតិអាមេរិកផងដែរ។
ក្រៅពីការដាក់ទណ្ឌកម្មទៅលើមន្ត្រីយោធា និងនគរបាលជាន់ខ្ពស់ ទាំង៦នាក់នេះ សហរដ្ឋអាមេរិក ក៏បានដកហូតទិដ្ឋាការមនុស្ស៤៩នាក់ដែលមានទំនាក់ទំនងជាមួយលោក ម៉ាឌូរ៉ូ ផងដែរ។ ការដាក់ទណ្ឌកម្មប្រឆាំមនុស្សជំនិតលោក ម៉ាឌូរ៉ូ ដែលអាមេរិកធ្វើឡើងនាពេលនេះ ត្រូវបានគេមើលឃើញថា ជាយុទ្ធសាស្រ្តមួយដើម្បីដាក់សម្ពាធឲ្យមេដឹកនាំវេណេស៊ុយអេឡារូបនេះចុះចេញពីដំណែង៕