គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានប្រកាសចាប់ផ្ដើមដំណើរការចុះឈ្មោះអង្គបោះឆ្នោតសម្រាប់ការបោះឆ្នោតក្រុមប្រឹក្សាខេត្ត-រាជធានី និងស្រុក-ខណ្ឌ ចាប់ពីថ្ងៃនេះ។
ក្នុងសេចក្តីជូនដំណឹងរបស់ខ្លួននៅថ្ងៃនេះ គ.ជ.ប បានប្រកាសថា ការិយាល័យបោះឆ្នោតរបស់ខ្លួនចំនួន ១៦៤៦កន្លែងនៅទូទាំងប្រទេស បានបើកទទួលចុះឈ្មោះសម្រាប់ការបោះឆ្នោតជ្រើសរើសក្រុមប្រឹក្សាអាណត្តិទី៣ នៅថ្ងៃនេះ រហូតដល់ថ្ងៃទី១៩ ខែមីនានេះ។
គ.ជ.ប បានឲ្យដឹងទៀតថា អ្នកអាចបោះឆ្នោតសម្រាប់ការបោះឆ្នោតជ្រើសរើសក្រុមប្រឹក្សា គឺជាសមាជិកក្រុមប្រឹក្សាឃុំ-សង្កាត់ នៅក្នុងមុខតំណែងដែលមានសមាជិកសរុបចំនួន ១១,៥៧២នាក់ នៅទូទាំងប្រទេស។
គ.ជ.ប បញ្ជាក់ថា ក្រុមប្រឹក្សាឃុំ-សង្កាត់ ទាំងអស់ត្រូវរៀបចំបញ្ជីឈ្មោះសមាជិកក្រុមប្រឹក្សាឃុំ-សង្កាត់ នៅក្នុងមុខតំណែង រួចប្រធានក្រុមប្រឹក្សាឃុំ-សង្កាត់ និងជាមេឃុំ ចៅសង្កាត់ត្រូវចុះហត្ថលេខា និងបោះត្រារដ្ឋបាលឃុំ-សង្កាត់ ដែលមានការបញ្ជាក់ឯកភាព ពីអភិបាលក្រុង-ស្រុក-ខណ្ឌ អភិបាលរាជធានី ខេត្តពាក់ព័ន្ធ រួចបញ្ជូនមក គ.ជ.ប ឱ្យបានតាមកាលបរិច្ឆេទកំណត់ ពីថ្ងៃទី៤ ដល់ថ្ងៃទី២៧ ខែមីនា ឆ្នាំ២០១៩៕
