មេដឹកនាំ​បក្សប្រឆាំង​វេណេហ្សូអេឡា​វិល​ចូល​ស្រុក​ទាំង​ប្រឈម​គ្រោះថ្នាក់​

មេដឹកនាំបក្សប្រឆាំងនៅវេណេហ្សូអេឡា ទទួលបានការគាំទ្រកាន់តែច្រើន បន្ទាប់ពីលោកវិលចូលក្នុងប្រទេសកំណើតវិញកាលពីម្សិលមិញ ទាំងប្រឈមគ្រោះថ្នាក់ដល់អាយុជីវិត និងជាប់ពន្ធនាគារ។

កាលពីសប្តាហ៍មុន លោក​ Juan Guaido  មេដឹកនាំបក្សប្រឆាំងនៅវេណេហ្សូអេឡា បានចាកចេញពីប្រទេសទៅបំពេញទស្សនកិច្ចនៅប្រទេសលោកសេរីមួយចំនួន​ក្នុងនាមជាមេដឹកនាំប្រទេសបំពេញការងារការទូត។​

ក្នុងអំឡុងពេលដែលមេដឹកនាំបក្សប្រឆាំងរូបនេះចាកចេញពីប្រទេស ទទួលការព្រមានថា វិលវិញនឹងមានការចាប់ខ្លួន ដោយសារតែប្រឆាំងបំរាមរបស់តុលាការមិនឲ្យចាកចេញពីប្រទេស ទន្ទឹមនឹងនេះ ក៏ទទួលរងការព្រមានដែរថា ពេលវិលចូលប្រទេសវិញនឹងប្រឈមការបាញ់សម្លាប់។​

ទោះយ៉ាងណា ចាប់ពីលោកវិលត្រឡប់ចូលប្រទេសវិញកាលពីម្សិលមិញ គឺមិនមានការចាប់ខ្លួន ឬ បាញ់សម្លាប់ទេ ផ្ទុយទៅវិញប្រជាពលរដ្ឋនៃប្រទេសនេះច្រើនកុះករទៅស្វាគមន៍មេបក្សប្រឆាំងរូបនេះនៅព្រលានយន្តហោះ។​

លោក Juan Guaido ប្រកាសតាំងខ្លួនឯងកាលពីថ្ងៃទី២៣ ខែមករា ថា លោកជាប្រធានាធិបតី បន្ទាប់ពីការតវ៉ាប្រឆាំងការបោះឆ្នោត កាលពីខែឧសភា ឆ្នាំ២០១៨ ថា ដំណើរការមិនត្រឹមត្រូវ ដោយលោកប្រធានាធិបតី Nicolas Maduro បានរារាំងមិនឲ្យគណបក្សប្រឆាំងចូលរួមប្រកួតប្រជែង។​

ប្រទេសជាង៥០ រួមទាំងសហរដ្ឋអាមេរិក​ផង បានប្រកាសដាក់ទណ្ឌកម្មលើរដ្ឋាភិបាលលោក Maduro និងទទួលស្គាល់រដ្ឋាភិបាលដឹកនាំដោយលោក Juan Guaido។​

ព្រឹត្តិការណ៍ដែលមានការចាប់អារម្មណ៍ខ្លាំងពីសាធារណជននោះគឺ ពេលដែលលោក Juan Guaido ចូលដល់ព្រលានយន្តហោះវេណេហ្សូឡា មន្ត្រីអន្តោប្រវេសន៍ថ្លែងថា៖ «ស្វាគមន៍លោកប្រធានាធិបតី» ។

ក្រោយការវិលត្រឡប់ចូលប្រទេសកំណើតវិញ មេដឹកនាំបក្សប្រឆាំងរូបនេះ មានប្រជាប្រិយភាពកើនឡើងទាំងខាងក្នុង និងខាងក្រៅប្រទេស។​

ពេលចូលដល់ក្នុងប្រទេសភ្លាម លោក Juan Guaido អំពាវនាវឲ្យប្រជាពលរដ្ឋចូលរួមសកម្មភាពតវ៉ាទ្រង់ទ្រាយធំ ដើម្បីជំរុញឲ្យលោក Maduro លាលែងចេញពីតំណែង។​

មុនមួយថ្ងៃនៃការវិលចូលប្រទេសវិញរបស់លោក Guaido អនុប្រធានាធិបតីសហរដ្ឋអាមេរិក លោក Mike Pence  សរសេរនៅលើបណ្តាញសង្គម Twitters របស់លោកថា ការវិលត្រឡប់ចូលប្រទេសវិញរបស់លោក Guaido ត្រូវតែមានសុវត្ថិភាពហើយថា បើមានការគំរាមកំហែង  ហិង្សា ឬ ការបំភិតបំភ័យណាមួយកើតឡើងនោះ អាមេរិកមិនអត់ឱនឲ្យទេ ហើយនឹងចាត់វិធានការឆ្លើយតបភ្លាម។​

​