ប្រធានាធិបតីកូរ៉េខាងត្បូង នឹងមកបំពេញទស្សនកិច្ចផ្លូវរដ្ឋរយៈពេល៣ថ្ងៃនៅកម្ពុជា ដើម្បីពង្រឹងមិត្តភាព និងបង្កើនកិច្ចសហប្រតិបត្តិការរវាងប្រទេសទាំងពីរ នាសប្តាហ៍ក្រោយនេះ។
សេចក្ដីប្រកាសព័ត៌មានរបស់ក្រសួងការបរទេសចុះកាលពីម្សិលមិញបានឲ្យដឹងថា ប្រធានាធិបតីកូរ៉េខាងត្បូង លោក មូន ចេអ៊ីន (Moon Jae In) នឹងមកបំពេញទស្សនកិច្ចផ្លូវរដ្ឋលើកដំបូងនៅកម្ពុជា ចាប់ពីថ្ងៃទី១៤ ដល់១៦ ខែមីនា ឆ្នាំ២០១៩។ ប្រធានាធិបតីរូបនេះ នឹងចូលគាល់ព្រះករុណា ព្រះបាទសម្តេចព្រះបរមនាថ នរោត្តម សីហមុនី និងជួបលោកនាយករដ្ឋមន្រ្តី ហ៊ុន សែន ដើម្បីពិភាក្សាពីការជម្រុញទំនាក់ទំនងទ្វេភាគី និងពង្រីកសហប្រតិបត្តិការលើវិស័យនានាបន្ថែមទៀតផងដែរ។
ក្នុងទស្សនកិច្ចនេះ ថ្នាក់ដឹកនាំនៃប្រទេសទាំងពីរនឹងធ្វើជាសាក្សីក្នុងពិធីចុះហត្ថលេខាលើកិច្ចព្រមព្រៀងមួយចំនួន និងធ្វើសេចក្ដីប្រកាសព័ត៌មានរួមគ្នាផងដែរ។
គួររំលឹកផងដែរថាកាលពីខែកញ្ញា ឆ្នាំ២០១៨កន្លងទៅ លោក ហ៊ុន សែន ក៏បានជួបនាយករដ្ឋមន្រ្តីនៃសាធារណៈរដ្ឋកូរ៉េ លោក លី ណាក់យៀន (Lee Nak Yeon) ដើម្បីពិភាក្សាពីការបង្កើនកិច្ចសហប្រតិបត្តិការរវាងប្រទេសទាំងពីរផងដែរ៕
