កម្ពុជា-ឡាវ នឹងពង្រីកកិច្ចសហប្រតិបត្តិការដើម្បីទប់ស្កាត់ និងបង្រ្កាបបទល្មើសគ្រឿងញៀនឆ្លងដែនរវាងប្រទេសទាំងពីរ បន្ថែមទៀតក្នុងឆ្នាំ២០១៩នេះ។
យោងតាមការចុះផ្សាយលើទំព័រហ្វេសប៊ុករដ្ឋមន្ត្រីក្រសួងមហាផ្ទៃ លោក ស ខេង កាលពីម្សិលមិញឲ្យដឹងថា លោកបានជួបពិភាក្សាការងារជាមួយរដ្ឋមន្រ្តីក្រសួងសន្តិសុខសាធារណៈនៃប្រទេសឡាវ លោក វីឡែ ឡាខាំហ្វង។ រដ្ឋមន្រ្តីនៃប្រទេសទាំងពីរបានសន្យាថា នឹងខិតខំពង្រីកកិច្ចសហប្រតិបត្តិការទប់ស្កាត់ និងបង្ក្រាបបទល្មើសគ្រឿងញៀនឆ្លងដែនឲ្យកាន់តែសកម្មថែមទៀត។
លោក ស ខេង បានសរសេរលើហ្វេសប៊ុកថា៖ «ភាគីទាំងពីរមិនត្រូវឲ្យគ្រឿងញៀនមកត្រួតត្រាឡើយ ពោលគឺអាជ្ញាធរត្រូវធ្វើយ៉ាងណាត្រួតត្រាគ្រឿងញៀនឲ្យបាន»។
ប្រភពដែលបន្ថែមទៀតថា ថ្នាក់ដឹកនាំក្រសួងទាំងពីរក៏បានពិភាក្សា និងព្រមព្រៀងគ្នាពិនិត្យលទ្ធភាពដែលឈានទៅបើកច្រកព្រំដែនជាមួយគ្នាបន្ថែមទៀតក្នុងឆ្នាំ២០១៩នេះ ដើម្បីសម្រួលការធ្វើដំណើរចេញចូល និងពង្រីកការផ្លាស់ប្ដូរពាណិជ្ជកម្មនៃប្រទេសទាំងពីរ។
អាជ្ញាធរខេត្តស្ទឹងត្រែងកាលពីខែមិថុនា ឆ្នាំ២០១៨ បានឃាត់ខ្លួនជនជាតិខ្មែរបីនាក់ ដែលធ្វើដំណើរតាមរថយន្ដក្រុងពីប្រទេសឡាវមកភ្នំពេញ ដោយឆ្លងកាត់ខេត្តស្ទឹងត្រែង។ សមត្ថកិច្ចរកឃើញថា ជនសង្ស័យទាំងនោះបានដឹកជញ្ជូនថ្នាំញៀន មេតំហ្វេតាមីនក្រាមម្ស៉ៅចំនួន១២០គីឡូក្រាមក្នុងរថយន្តក្រុងនោះ។
យោងតាមរបាយការណ៍អាជ្ញាធរជាតិប្រយុទ្ធប្រឆាំងគ្រឿងញៀនក្នុងឆ្នាំ២០១៨ បានឲ្យដឹងថាសមត្ថកិច្ចបានបង្រាបបទល្មើសគ្រឿងញៀនចំនួន ៨០០៣ករណី ដោយរឹបអួសគ្រឿងញៀនគ្រប់ប្រភេទជាង៥៣៣គីឡូក្រាម។
