ពលរដ្ឋជាង៧០នាក់ធ្លាក់ខ្លួនឈឺបន្តបន្ទាប់កាលពីព្រឹកម្សិលមិញ សង្ស័យពុលអាហារនៅស្រុកព្រះស្ដេច ខេត្តព្រៃវែង។
អធិការស្រុកព្រះស្ដេច លោក ជ័យ សេងហ៊ាង បានប្រាប់ វីអូឌី ថា កាលពីម្សិលមិញ មានមនុស្ស៧២នាក់សង្ស័យពុលអាហារ នៅភូមិថ្កោល ឃុំបឹងដោល ស្រុកព្រះស្ដេច ខេត្តព្រៃវែង។ លោកបន្ថែមថា ក្នុងករណីនេះមិនទាន់ដឹងមូលហេតុពិតប្រាកដនៅឡើយ ដោយថា សំណាកដែលក្រសួងសុខាភិបាលយកទៅពិនិត្យមិនទាន់ទទួលបានលទ្ធផល។
ទោះយ៉ាងណានៅលើហ្វេសប៊ុករបស់លោក ស ខេង រដ្ឋមន្ត្រីក្រសួងមហាផ្ទៃបញ្ជាក់ថា ពលរដ្ឋទាំងនោះពុលនំបញ្ចុក។
ប្រធានការិយាល័យសុវត្ថិភាពចំណីអាហារនៃក្រសួងសុខាភិបាល លោក អាំង ហុកស្រ៊ុនអះអាងថា កាលពីឆ្នាំ២០១៨កន្លងទៅ មានអ្នកជំងឺដោយសារពុលចំណីអាហារចំនួន២០៣នាក់ និងស្លាប់ ១២នាក់។
