សហរដ្ឋអាមេរិកបានផ្តល់ជំនួយចំនួន២លានដុល្លារអាមរិកមកដល់កម្ពុជា ដើម្បីជួយគាំទ្រសកម្មភាពដោះមីនរយៈពេលពេញ១ឆ្នាំ។ នេះបើតាមការបញ្ជាក់ពីអគ្គនាយកមជ្ឈមណ្ឌលកម្ចាត់មីនស៊ីម៉ាក់ លោក ហេង រតនា។
អគ្គនាយកមជ្ឈមណ្ឌលកម្ចាត់មីនស៊ីម៉ាក់ លោក ហេង រតនា បានសរសេរលើទំព័រហ្វ៊េសប៊ុករបស់លោកកាលពីម្សិលមិញថា ក្រសួងការបរទេសអាមេរិកបានសម្រេចផ្តល់ជំនួយទៅអង្គភាពស៊ីម៉ាក់ចំនួន២លានដុលា្លរសំរាប់រយៈពេល១២ខែ ដោយគិតចាប់ពីថ្ងៃ០១ ខែមីនា ឆ្នាំ២០១៩ ដល់ថ្ងៃទី២៨ ខែកុម្ភ: ២០២០។ លោកបញ្ជាក់ថា នេះជាគម្រោងទី២ហើយ បន្ទាប់ពីការដេញថ្លៃបានកាលពីឆ្នាំ២០១៨។
សហរដ្ឋអាមេរិក ធា្លប់អះអាងថា នៅក្នុងរយៈពេល២០ឆ្នាំចុងក្រោយនេះ ខ្លួនបានចំណាយថវិកាជាង១៣១លានដុល្លារសំរាប់គម្រោងមនុស្សធម៌នៅកម្ពុជា ដើម្បីដោះមីន និងយុទ្ធភណ្ឌមិនទាន់ផ្ទុះដទៃទៀត ដែលសល់ពីជម្លោះផ្ទៃក្នុង និងជម្លោះក្នុងតំបន់កាលពីសម័យសង្គ្រោម។
យោងតាមរបាយការណ៍របស់អាជ្ញាធរមីនកម្ពុជាគិតត្រឹមខែវិច្ឆិកា ឆ្នាំ២០១៨ ជនរងគ្រោះដោយសារគ្រាប់មីននិងគ្រាប់មិនទាន់ផ្ទុះសរុបចំនួន៦៤៧៧១ នាក់ក្នុងនោះជិត២ម៉ឺននាក់ត្រូវបានស្លាប់ និងមានប្រមាណជាង៤ម៉ឺននាក់ទៀតបានពិការភាព៕
