អនុប្រធានសភាវេណេស៊ុយអេឡា បានចោទប្រកាន់រដ្ឋមន្រ្តីក្រសួងការបរទេសដែលជាបក្សពួករបស់ប្រធានាធិបតី នីកូឡាស ម៉ាឌូរ៉ូ ថាបានជិះទៅហោះធ្វើដំណើរទៅកាន់ទីក្រុងអាតែន ដើម្បីលក់មាសដែលជារបស់ជាតិ។
ទីភ្នាក់ងារសារព័ត៌មានរុស្ស៊ី Sputnik news បានចុះផ្សាយថា លោក Jose Guerra អនុប្រធានសភាវេណេស៊ុយអេឡា បានចោទប្រកាន់លើរដ្ឋមន្រ្តីក្រសួងការបរទេស លោក Jorge Arreaza ថាបានជិះយន្តហោះទៅក្រុងអាតែន ដើម្បីឲ្យប្រទេសក្រិកជួយសម្របសម្រួលដោះដូរមាស ជាមួយនឹងប្រាក់អឺរ៉ូ។ ប្រភពខាងដដែលឲ្យដឹងថា រដ្ឋមន្រ្តីការបរទេសវេណេស៊ុយអេឡារូបនេះ ជ្រើសរើសយកប្រទេសក្រិក ដោយសារតែប្រទេសក្នុងសហភាពអឺរ៉ុបមួយនេះនៅតែទទួលស្គាល់លោក ម៉ាឌូរ៉ូ ជាប្រធានាធិបតីវេណេស៊ុយអេឡា ខណៈប្រទេសសមាជិកដទៃទៀតទទួលស្គាល់លោក Juan Guaido។
ទោះយ៉ាងណាក៏ដោយ ប្រទេសក្រិកបានបដិសេធការចោទប្រកាន់នេះ។ នាយកដ្ឋានអាកាសចរណ៍ស៊ីវិលក្រិក បានលើកឡើងក្នុងសេចក្តីប្រកាសព័ត៌មានមួយដែលសារព័ត៌មាន Sputnik news ចុះផ្សាយបន្តថា យន្តហោះដែល លោក Jorge Arreaza ជិះ បានចូលចតនៅក្រុងអាតែនកាលពីថ្ងៃទី២ ខែមីនា គឺដើម្បីចាក់ប្រេងតែប៉ុណ្ណោះ។ ប្រភពពដដែល បន្ថែមថា យន្តហោះនោះ បានចាកចេញពីក្រិកទៅកាន់ប្រទេស Cape Verd នៅថ្ងៃនោះតែម្តង ហើយក៏គ្មានមន្រ្តីប្រទេសក្រិកណាម្នាក់ចូលជួបរដ្ឋមន្រ្តីការបរទេសវេណេស៊ុយអេឡារូបនេះដែរ។
លោក Jose Guerra ជាមនុស្សស្និទ្ធនឹងមេបក្សប្រឆាំង លោក Juan Guaido ដែលប្រកាសខ្លូនជាប្រធានាធិបតីវេណេស៊ុយអេឡាបណ្ដោះអាសន្ នកាលពីថ្ងៃទី២៣ ខែមករា កន្លងទៅ។
កាលពីចុងខែមករាកន្លងទៅ លោក Jose Guerra បានចោទថា លោក ម៉ាឌូរ៉ូ បានរៀបចំឲ្យយន្តហោះរុស្ស៊ីដឹកមាសចំនួន២០តោនចេញពីប្រទេសវេណេស៊ុយអេឡា ដែលមានតម្លៃជាទឹកប្រាក់ប្រមាណជា៨៤០លានដុល្លារ។ ទោះយ៉ាងណាក៏ដោយ រដ្ឋាភិបាលក្រុងក្រឹមឡាំងបានចេញមុខភ្លាមៗច្រានចោលការចោទប្រកាន់នេះ៕