ស្ថាបនិកនៃអង្គការមូលនិធិកុមារកម្ពុជា លោក Scott Neeson បានឲ្យដឹងថា កុមារីម្នាក់ត្រូវបានរំលោភផ្លូវភេទ ក្រោយពីត្រូវបានល្បួង និងដាក់ថ្នាំសណ្ដំ កាលពីថ្ងៃអង្គារកន្លងមកនេះ។
ស្ថាបនិកអង្គការជួយកុមារកម្ពុជារូបនេះ បានអះអាងបែបនេះនៅលើទំព័រហ្វេសប៊ុករបស់លោកកាលពីថ្ងៃម្សិលមិញ។
លោក Scott Neeson បានរៀបរាប់ថា កុមារីម្នាក់អាយុ ៨ឆ្នាំ ត្រូវបានគេរំលោភសេពសន្ថវៈអំឡុងពេលធ្វើដំណើរទៅរៀននៅសាលាមួយស្ថិតនៅម្ដុំទួលគោក។
បើតាមលោក Scott Neeson កុមារីនោះ ត្រូវបានរកឃើញវិញនៅម្ដុំបឹងទំពុន ១ម៉ោងក្រោយពីត្រូវបានបោកបញ្ឆោតថា ម្ដាយរបស់កុមារីរូបនោះរងគ្រោះថ្នាក់ចរាចរណ៍។
លោក Scott Neeson បានអះអាងថា កុមារីរូបនេះ ត្រូវបានល្បួងយកទៅរំលោភផ្លូវភេទ ក្រោយពីត្រូវថ្នាំសណ្ដំ។
ប្រធានផ្នែកគាំពារកុមារនៃអង្គភាពការពារកុមារ អ្នកនាង សោម វឌ្ឍនា បានប្រាប់ វីអូឌី នៅថ្ងៃថា នគរបាលបានទទួលពាក្យបណ្ដឹងអំពីករណីនេះរួចហើយ ហើយថា ស្ថានភាពរបស់កុមារីរូបនោះ បានល្អប្រសើរឡើងវិញហើយ ក្រោយទទួលបានការព្យាបាលនៅឯមន្ទីរពេទ្យ។
មាត្រា៣៩ នៃច្បាប់ស្តីពីការរំលោភបំពានផ្លូវភេទ ចែងថា ជនដែលរំលោភបំពានផ្លូវភេទលើអនីតិជន ប្រឈមជាប់ពន្ធនាគារពី ៥ ទៅ ១០ឆ្នាំ ហើយនៅក្នុងចំណុចមួយនៃគោលនយោបាយភូមិឃុំមានសុវត្ថិភាព ក៏បានចែងពីការប្រឆាំងអំពើហិង្សាផ្លូវភេទ ឬការរំលោភបំពានផ្លូវភេទដែរ៕