អាជ្ញាធរស្រុកមេមត់ ខេត្តត្បូងឃ្មុំ មិនអនុញ្ញាតិឲ្យសហគមន៍មូលដ្ឋាន ធ្វើពិធីអបអរទិវានារីអន្តរជាតិ ៨មីនា ដែលធ្វើឡើងនៅថ្ងៃនេះទេ បើទោះបីក្រសួងមហាផ្ទៃធ្លាប់ណែនាំថា ពួកគេអាចធ្វើសកម្មភាពបាន ដោយមិនចាំបាច់ជូនដំណឹងជាមុនក៏ដោយ។
លិខិតចុះថ្ងៃទី៧ ខែមីនា រដ្ឋបាលស្រុកមេមត់លើកឡើងថា ខ្លួនមិនអនុញ្ញតិឲ្យតំណាងសហគមន៍ និងប្រជាពលរដ្ឋមកពីឃុំទន្លុក ឃុំជំាក្រវៀន ឃុំដារ និង ឃុំចាន់មូល រៀបចំពីធីអបអរសារទរទិវាសិទ្ធិនារីអន្តរជាតិ ៨មីនា ទេ ដោយតម្រូវឲ្យសហគមន៍ទាំងនោះ រៀបចំសំណុំបែបបទស្នើសុំការទទួលស្គាល់ពីក្រសួងមហាផ្ទៃជាមុនសិន ទើបអាចធ្វើសកម្មភាពបាន។
សេចក្តីណែនាំចុះថ្ងៃទី២៧ ខែវិច្ឆិកា ឆ្នាំ២០១៨ របស់ក្រសួងមហាផ្ទៃ បានលើកឡើងថា សមាគមអង្គការមិនមែនរដ្ឋាភិបាលដែលបានចុះបញ្ជីត្រឹមត្រូវ ព្រមទាំងសហគមន៍នានានៅមូលដ្ឋានមានសិទ្ធិសេរីភាពពេញលេញក្នុងការធ្វើសកម្មភាពក្នុងព្រះរាជាណាចក្រកម្ពុជាស្របតាមច្បាប់និងលិខិតបទដ្ឋានគតិយុត្តិព្រមទាំងលក្ខន្តិកៈរបស់ខ្លួន ដោយមិនចាំបាច់ជូនដំណឹងមុនឡើយ។
ទោះយ៉ាងណាក៏ដោយ តំណាងសហគមន៍លោក យ៉ែម គង់ ប្រាប់ VOD ថា មកដល់ពេលនេះការប្រារព្ធពិធីបានធ្វើឡើងតាមការគ្រោងទុកដោយគ្មានការរំខានពីអាជ្ញាធរឡើយ៕