របាយការណ៍ចុះផ្សាយរបស់ទីភ្នាក់ងារព័ត៌មានវៀតណាមបង្ហាញថា នៅក្នុងឆ្នាំ២០១៨ អ្នកស្វែងរកសេវាថែទាំសុខភាពមានការកើនឡើងដល់ប្រមាណ៣០០ ០០០នាក់ ក្នុងនោះភាគច្រើនលើសលប់ពីប្រទេសកម្ពុជា និងប្រទេសឡាវ។
របាយការណ៍នោះបញ្ជាក់ថា អ្នកស្វែងរកសេវាសុខភាពទាំងនោះមានដូចជា វះកាត់ធ្មេញ វះកាត់បេះដូង ព្យាបាលមហារីក វះកាត់កែសម្ផស្ស និងជំងឺផ្សេងៗទៀត។
ទោះយ៉ាងណារបាយការណ៍នោះមិនបានបញ្ជាក់បែងចែកថា អ្នកជំងឺពីប្រទេសកម្ពុជាមានប៉ុន្មាន? និងជំងឺពីប្រទេសឡាវមានប៉ុន្មាននាក់នោះទេ?
រដ្ឋមន្ត្រីក្រសួងសុខាភិបាលវៀតណាមលោក ង្វ្រៀន ធី គីមតៀន(Nguyen Thi Kim Tien)ថ្លែងថា ប៉ុន្មានឆ្នាំចុងក្រោយនេះ របាយការណ៍អ្នកស្វែងរកសេវាថែទាំសុខភាពនៅវៀតណាមកើនឡើងជាបន្តបន្ទាប់។ លោកបន្តថា ជនបរទេសដែលស្វែងរកសេវាថែទាំសុខភាពទាំងនោះភាគច្រើនបានថ្លែងអរគុណ ចំពោះការខិតខំប្រឹងប្រែងព្យាបាល វេជ្ជបណ្ឌិតមានសមត្ថភាព ជំនាញខ្ពស់ បើប្រៀបធៀបជាមួយប្រទេសផ្សេងៗ។