ក្រសួងសុខាភិបាលណែនាំពីវិធីសាស្ត្រថែទាំសុខភាពក្នុងរដូវក្តៅ ដោយកុំពិសាវត្ថុរាវដែលមានជាតិអាល់កុល ឬ ជាតិស្ករច្រើន ហើយត្រូវជំនួសមកវិញជាតិទឹក។
តាមសេចក្តីណែនាំរបស់នាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល បានលើកឡើងថា ការពិសាជាតិអាល់កុល និងជាតិស្ករច្រើននាំឲ្យបាត់បង់ជាតិទឹកក្នុងខ្លួន។
សេចក្តីណែនាំ៖« បង្កើនការទទួលទានជាតិទឹកឆ្អិនឲ្យបានច្រើននិងញឹកញាប់តាមដែលអាចធ្វើទៅបាន ដោយមិនត្រូវរង់ចាំរហូតដល់ស្រេកទឹកទេ ។ កុំពិសាវត្ថុរាវដែលមានជាតិអាល់កុលឬជាតិស្ករច្រើនពេក ពីព្រោះសារធាតុទាំងនេះបង្កឲ្យអ្នកកាន់តែបាត់បង់ជាតិទឹកច្រើន។ »
ក្រសួងក៏បានណែនាំវិធានការផ្សេងៗទៀតដូចជា ស្លៀកពាក់សម្លៀកបំពាក់ស្តើង ឬ មានពណ៌ស្រាល និងស្លៀកពាក់រលុង ជៀសវាងអាហារក្តៅ និងការបរិភោគអាហារច្រើនពេកជាដើម។
