សាច់ញាតិអ្នកបាត់ខ្លួននៅលើយន្តហោះMH370 ដែលបាត់ខ្លួនទាំងអាថ៌កំបាំង កាលពីឆ្នាំ២០១៤នៅតែទាមទារឲ្យមានការបកស្រាយឲ្យសមស្របពីក្រុមអ្នកស្រាវជ្រាវពីលទ្ធផលដែលរកឃើញ។
ក្រុមហ៊ុនដឹកអ្នកដំណើររបស់ម៉ាឡេស៊ីផ្ទុកមនុស្សចំនួន២៣៩នាក់ ភាគច្រើនជាជនជាតិចិន ធ្វើដំណើរពីទីក្រុងកូឡាឡាំពូទៅទីក្រុងប៉េកាំងបានបាត់ការទាក់ទងកាលពីថ្ងៃទី៨ខែមីនាឆ្នាំ២០១៤។
ក្រោយការបាត់ភ្លាមរដ្ឋាភិបាលម៉ាឡេស៊ី និងរដ្ឋាភិបាលប្រទេសផ្សេងៗទៀតដឹកមុខដោយអូស្ត្រាលីបានជួយស្រាវជ្រាវក្នុងផ្ទៃសមុទ្រដែលសង្ស័យបាត់លើផ្ទៃទឹកទំហំ១២០ ០០០គីឡូម៉ែត្រការ៉េ ប៉ុន្តែមិនមានសញ្ញាអ្វីទាំងអស់។ រហូតដល់ខែមករា ឆ្នាំ២០១៧ អ្នកពាក់ព័ន្ធទាំងអស់បានសម្រេចផ្អាកការស្រាវជ្រាវរក។
កាលពីម្សិលមិញសាច់ញាតិអ្នកបាត់ខ្លួនទាំងនោះប្រមាណ៥០នាក់ បានធ្វើដំណើរទៅទីក្រុងប៉េកាំងដើម្បីជួបជុំគ្នារំឭកខួបនៃការបាត់យន្តហោះMH370 ហើយជំរុញឲ្យមន្ត្រីជំនាញបន្តការស្រាវជ្រាវរកទៀត។
