ប៊ួអ៊ីង ដែលជាក្រុមហ៊ុនផលិតយន្តហោះដ៏ធំរបស់សហរដ្ឋអាមេរិក កំពុងប្រឈមមុខនឹងការចោទសួរពីបញ្ហាសុវត្ថិភាព ដោយសារតែក្នុងរយៈពេល៥ខែ យន្តហោះពីរគ្រឿងរបស់ក្រុមហ៊ុននេះ បានធ្លាក់។
កាលពីថ្ងៃអាទិត្យម្សិលមិញ យន្តហោះប៊ួអ៊ីង ៧៣៧ របស់ក្រុមហ៊ុនអាកាសចរណ៍អេត្យូពី បានធ្លាក់ ក្រោយហោះបានតែ៦នាទីប៉ុណ្ណោះ។ យន្តហោះនេះ ហោះចេញពីទីក្រុង Addis Ababa ប្រទេសអេត្យូពី ឆ្ពោះទៅកាន់ទីក្រុង Nairobi ប្រទេសកេនយ៉ា ហើយមានផ្ទុកអ្នកដំណើរចំនួន១៤៩នាក់ និងបុគ្គលិកបម្រើការលើយន្តហោះចំនួន ៨នាក់។ តាមសេចក្តីរាយការណ៍ មនុស្សទាំង១៥៧នាក់ គ្មាននរណាម្នាក់នៅរស់រានមានជីវិតឡើយ។
យន្តហោះរបស់ក្រុមហ៊ុនអាកាសចរណ៍អេត្យូពីដែលធ្លាក់កាលពីម្សិលមិញ ជាប្រភេទដូចគ្នានឹងយន្តហោះក្រុមហ៊ុន LionAir របស់ឥណ្ឌូណេស៊ីដែលបានធ្លាក់កាលពីខែតុលា ឆ្នាំ២០១៨កន្លងទៅ ហើយបានឆក់យកជីវិតអ្នកនៅលើយន្តហោះនោះរហូតដល់១៨៩នាក់ ក្រោយពីហោះបានតែ១៣នាទីប៉ុណ្ណោះ។
ទាំងយន្តហោះរបស់ក្រុមហ៊ុនអាកាសចរណ៍អេត្យូពី និងក្រុមហ៊ុន LionAir របស់ឥណ្ឌូនេស៊ី ជាប្រភេទប៊ួអ៊ីង ៧៣៧ MAX ដែលជាយន្តហោះស៊េរីទំនើបចុងក្រោយមួយរបស់ក្រុមហ៊ុនប៊ួអ៊ីង។ ប៊ួអ៊ីង ៧៣៧ MAX ត្រូវបានដាក់ឲ្យដំណើរការជាលើកដំបូងនៅឆ្នាំ២០១៧។
មូលហេតុនៃការធ្លាក់យន្តហោះទាំងពីរនេះ មិនទាន់ត្រូវបានគេរកឃើញនៅឡើយទេ។
លោក Richard Aboulafia អ្នកវិភាគផ្នែកអាកាសចរណ៍មួយរូប បានថ្លែងប្រាប់សារព័ត៌មាន CNN ថា ប្រសិនការធ្លាក់យន្តហោះប្រភេទប៊ួអ៊ីង ៧៣៧ MAX ទាំងពីរលើកនេះ មានមូលហេតុដូចគ្នា ក្រុមហ៊ុនប៊ួអ៊ីង ត្រូវតែធ្វើការកែសម្រួលជាបន្ទាន់លើយន្តហោះប្រភេទនេះ។ លោក បន្តថារបៀបនៃការបណ្តុះបណ្តាលក្រុមអាកាសយានិកដែលបើកយន្តបោះប្រភេទនេះក៏ត្រូវកែប្រែផងដែរ។
អ្នកវិភាគរូបនេះ លើកឡើងថា ក្រុមហ៊ុនអាកាសចរណ៍ និងអ្នកដំណើរ កាន់តែច្រើនបានចោទសួរពីសុវត្ថិភាពរបស់ប៊ួអ៊ីង ៧៣៧ MAX។ លោក បន្ថែមថា ប្រសិនបើមានការព្រួយបារម្ភបែបនេះ ក្រុមហ៊ុនប៊ួអ៊ីង គួរផ្អាកជាបណ្ដោះអាសន្នកុំឲ្យយន្តហោះប្រភេទនេះហោះហើរ។
ក្រុមហ៊ុនប៊ួអ៊ីង បានលើកឡើងក្នុងសេចក្តីប្រកាសព័ត៌មានមួយដែលចេញកាលពីម្សិលមិញថា ខ្លួនជាពិតជាមានសេចក្តីក្រៀមក្រំជាខ្លាំងជុំវិញការធ្លាក់យន្តហោះប៊ូអ៊ីង ៧៣៧ របស់ក្រុមហ៊ុនអាកាសចរណ៍អេត្យូពី។ ក្រុមហ៊ុននេះ បានបញ្ជាក់ថា ពួកគេត្រៀមខ្លួនជានិច្ចក្នុងការផ្ដល់ជំនួយបច្ចេកទេសនានាតាមការស្នើសុំ។
ការធ្លាក់យន្តហោះប៊ួអ៊ីង ៧៣៧ របស់ក្រុមហ៊ុនអាកាសចរណ៍អេត្យូពី ក៏ជំរុញឲ្យចិនពិនិត្យមើលពីការហោះហើរទាំងអស់របស់យន្តហោះប្រភេទនេះផងដែរ។
អាកាសចរណ៍ស៊ីវិលចិន នៅថ្ងៃចន្ទនេះ បានបញ្ជាឲ្យក្រុមហ៊ុនអាកាសចរណ៍ក្នុងស្រុកទាំងអស់របស់ខ្លួន ផ្អាកការហោះហើរយន្តហោះប្រភេទប៊ួអ៊ីង ៧៣៧ នេះ ដោយរង់ចាំអាជ្ញាធរចិន ទាក់ទងទៅក្រុមហ៊ុនប៊ួអ៊ីង និងភាគីអាមេរិកសិន។ តាមការចុះផ្សាយរបស់ទីភ្នាក់ងារសារព័ត៌មានរុស្ស៊ីRussia Today អាកាសចរណ៍ស៊ីវិលចិន បានឲ្យក្រុមហ៊ុនអាកាសចរណ៍ទាំងនោះប្រើយន្តហោះជំនាន់មុនប៊ួអ៊ីង ៧៣៧ ជំនួសវិញ។
សោនាដកម្មនៃការធ្លាក់យន្តហោះប្រភេទប៊ូអ៊ីង ៧៣៧ ចំនួនពីរលើកនេះ អាចនឹងធ្វើឲ្យប៉ះពាល់ដល់ក្រុមហ៊ុនប៊ូអ៊ីង ពីព្រោះតែមនុស្សមួយចំនួនបារម្ភពីបញ្ហាសុវត្ថិភាព ហើយអាចនឹងមានប្រទេសផ្សេងៗទៀតធ្វើតាមចិន ដោយផ្អាកដំណើរការយន្តហោះនេះជាបណ្ដោះអាសន្ន៕