គណៈប្រតិភូសហភាពអឺរ៉ុបគ្រោងមកបំពេញទស្សនកិច្ចនៅកម្ពុជានាសប្ដាហ៍ក្រោយនេះ ដើម្បីពិភាក្សាអំពីបញ្ហាប្រព័ន្ធអនុគ្រោះពន្ធជាមួយកម្ពុជា។
ឯកអគ្គរដ្ឋសហភាពអឺរ៉ុបប្រចាំកម្ពុជា លោក George Edgar ប្រាប់ VOD នៅថ្ងៃនេះថា មន្ដ្រីជាន់ខ្ពស់សហភាពអឺរ៉ុបទទួលបន្ទុកការងារការទូត និងនយោបាយការបរទេស និងមន្ដ្រីជាន់ខ្ពស់ទទួលបន្ទុកការងារពាណិជ្ជកម្ម នឹងមកកម្ពុជានៅសប្ដាហ៍ក្រោយនេះ។
យ៉ាងណាក៏ដោយ លោក George Edgar សុំមិនបញ្ជាក់លម្អិតអំពីកាលបរិច្ឆេទ និងថាតើ បញ្ហាណាខ្លះ នឹងត្រូវលើកយកទៅពិភាក្សានោះទេ។
អ្នកនាំពាក្យក្រសួងការបរទេសកម្ពុជា លោក កេត សោផាន់ ឲ្យ VOD ដឹងដែរថា រដ្ឋមន្ដ្រីការបរទេស លោក ប្រាក់ សុខុន ក្នុងឱកាសអបអរសាទរទិវា «ASEM DAY» ពីថ្ងៃម្សិលមិញ ក៏ថ្លែងថា លោកនឹងជួបពិភាក្សាជាមួយមន្ដ្រីគណៈកម្មាការអឺរ៉ុប ដែលគ្រោងមកកម្ពុជានាថ្ងៃទី២១ មីនាខាងមុខនេះ ពាក់ព័ន្ធកាតព្វកិច្ចរបស់កម្ពុជា ក្នុងការបន្ដទទួលបានប្រព័ន្ធអនុគ្រោះពន្ធ EBA របស់អឺរ៉ុប។
ដំណើរទស្សនកិច្ចរបស់ប្រតិភូសហភាពអឺរ៉ុបនេះ គឺធ្វើឡើងបន្ទាប់សហភាពអឺរ៉ុប កាលពីថ្ងៃទី១១ ខែកុម្ភៈកន្លងមក បានប្រកាសអំពីការចាប់ផ្ដើមនីតិវិធីដែលឈានទៅព្យួរជាបណ្ដោះអាសន្ននូវប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ» ពីកម្ពុជា បន្ទាប់ពីមើលឃើញការធ្លាក់ចុះនៃលទ្ធិប្រជាធិបតេយ្យ បញ្ហាសិទ្ធិមនុស្ស និងនិតិរដ្ឋនៅក្នុងរយៈពេល ១៨ខែចុងក្រោយមកនេះ៕