មេដឹកនាំម៉ាឡេស៊ីបញ្ជាក់ជំហរចាប់យកការទំនាក់ទំនងជាមួយចិន បើស្ថិតនៅក្នុងស្ថានភាពភូមិសាស្ត្រតម្រូវណាមួយដើម្បីសេដ្ឋកិច្ចជាតិក្នុងស្ថានភាពបច្ចុប្បន្ន ប៉ុន្តែស្ថិតនៅក្នុងលក្ខខណ្ឌប្រុងប្រយ័ត្នខ្ពស់។
ក្នុងបទសម្ភាសន៍ផ្តាច់មុខមួយជាមួយសារព័ត៌មាន South China Morning Post កាលពីថ្ងៃសុក្រសប្តាហ៍មុន លោក មហាធា មហាមេដ បញ្ជាក់ជំហរថា បើសិនជាមានការបង្ខំឲ្យជ្រើសរើសភូមិសាស្ត្រនយោបាយ ស្របពេលបញ្ហាសង្គ្រាមសេដ្ឋកិច្ចរវាងចិន និងសហរដ្ឋអាមេរិក គឺលោកជ្រើសរើសយកចិន។
លោកបញ្ជាក់ថា ស្ថានភាពរបស់អាមេរិកនៅពេលនេះមានភាពមិនប្រាកដប្រជា ក្រោមនយោបាយដឹកនាំរបស់លោកប្រធានាធិបតី ដូណាល់ ត្រាំ។
នៅពេលដែលមានការចោទសួរពីបញ្ហាសន្តិសុខជាតិដោយការចោទប្រកាន់ថា ក្រុមហ៊ុនចិន Huawei ដើរតួនាទីជាចារកម្មនោះ លោក មហាធា បញ្ជាក់ថា លោកកំពុងតែតាមដានករណីនេះយ៉ាងយកចិត្តទុកដាក់។
មេដឹកនាំវ័យ៩៣ឆ្នាំរូបនេះបញ្ជាក់ថា ចិនជាប្រទេសដែលមានទីតាំងនៅជិត មានសេដ្ឋកិច្ចរីកចម្រើន និងមានទីផ្សារធំដែលអាចធ្វើឲ្យសេដ្ឋកិច្ចរបស់ម៉ាឡេស៊ីនកើនឡើង។
ទោះយ៉ាងណាក្រោយពេលដែលលោក មហាធា មហាមេដ ឈ្នះការបោះឆ្នោតហើយឡើងកាន់តំណែង លោកប្រកាសលុបចោលគម្រោងហេដ្ឋារចនាសម្ព័ន្ធរបស់ក្រុមហ៊ុនចិនដែលមានទឹកប្រាក់ប្រមាណ២២ប៊ីលានដុល្លារ។ លោកបញ្ជាក់មូលហេតុនៃការលុបនោះ ដោយសារតែបញ្ហាបំណុលសាធារណៈរបស់ប្រទេសកើនឡើងដល់កម្រិតប្រកាសអាសន្ន និងម្យ៉ាងទៀត កម្ចីរបស់ចិនមានការប្រាក់ខ្ពស់ហួសហេតុ។
បើទោះជាម៉ាឡេស៊ីប្រកាសជំហរចាប់យកចិន ប៉ុន្តែ ចិនមិនបានទទួលប្រយោជន៍លើសលប់ ឬកេងចំណេញលើម៉ាឡេស៊ីបានទេ គឺរាល់កិច្ចព្រមព្រៀងណាដែលសង្ស័យថា ខូចដល់ប្រយោជន៍ជាតិ លោក មហាធា បានរុះរើកិច្ចព្រមព្រៀងទាំងនោះឡើងវិញ។
ម៉ាឡេស៊ីក៏ជាប្រទេសដែលមានជម្លោះដែនសមុទ្រ និងប្រឈមមុខជាប្រទេសចិនក្នុងដំណើរការស្វែងរកដំណោះស្រាយលើបញ្ហាទាំងនេះដែរ។
តាមរបាយការណ៍របស់ world top export បង្ហាញថា ចិនគឺជាដៃគូពាណិជ្ជកម្មទី២ អាមេរិកជាដៃគូពាណិជ្ជកម្មទី៣ ចំណែកសិង្ហបុរីគឺជាដៃគូពាណិជ្ជកម្មទី១របស់ប្រទេសម៉ាឡេស៊ី។
បច្ចុប្បន្នចិន និងសហរដ្ឋអាមេរិកកំពុងតែមានសង្គ្រាមពាណិជ្ជកម្ម ហើយដំឡើងពន្ធលើការនាំចូលរវាងគ្នាទៅវិញទៅមក។ ជម្លោះពាណិជ្ជកម្មនេះ បានធ្វើឲ្យបណ្តាប្រទេសមួយចំនួនផ្សេងៗទៀតរងផលប៉ះពាល់។
ប្រធានាធិបតីសហរដ្ឋអាមេរិកក៏បានដំឡើងពន្ធនាំចូលដែកថែបពីប្រទេសជាមិត្តភក្តិផ្សេងៗទៀត រួមទាំង កាណាដា អូស្ត្រាលី និងជប៉ុន ជាដើម។