អាកាសធាតុនឹងមានសភាពក្ដៅហួតហែងខ្លាំងក្នុងកំឡុងខែមេសា និងឧសភា ហើយសីតុណ្ហភាពនឹងឡើងដល់៤០ ទៅ៤២អង្សានៅតំបន់ទំនាបកណ្ដាលពាយព្យ និងខ្ពង់រាបភាគខាងជើង។
យោងតាមសេចក្ដីជូនដំណឹងរបស់ក្រសួងធនធានទឹក និងឧតុនិយមចុះកាលពីម្សិលមិញបានឲ្យដឹងថា រដូវប្រាំងឆ្នាំនេះនឹងអូសបន្លាយដល់ពាក់កណ្ដាលខែឧសភា។ សីតុណ្ហភាពជាមធ្យមទូទាំងប្រទេសគឺចន្លោះ ៣៦ ទៅ៣៨អង្សា ប៉ុន្តែ ខែមេសា និងឧសភា នឹងឡើងដល់៤០ ទៅ៤២អង្សានៅតំបន់ទំនាបកណ្ដាលពាយព្យ និងខ្ពង់រាបភាគខាងជើង ហើយបាតុភូតរន្ទះ និងខ្យល់កន្ត្រាក់អាចកើតមានច្រើនជាងបណ្ដាឆ្នាំកន្លងទៅ។
ក្រសួងក៏បានអំពាវនាវឲ្យប្រជាពលរដ្ឋរក្សាទឹកទុកសម្រាប់ប្រើប្រាស់ និងបង្កើនការប្រុងប្រយ័ត្នចំពោះបាតុភូតរន្ទះ និងខ្យល់កន្ត្រាក់។
