រដ្ឋាភិបាលលោក នីកូឡាស ម៉ាឌូរ៉ូ បានបណ្តេញមន្រ្តីទូតអាមេរិកចេញពីវេណេស៊ុយអេឡា ក្រោយចោទប្រទេសមហាអំណាចនេះ ជាអ្នកនៅពីក្រោយការដាច់ភ្លើងនៅក្នុងប្រទេសរបស់ខ្លួន។
កាលពីថ្ងៃអង្គារម្សិលមិញ រដ្ឋមន្រ្តីការបរទេសវេណេស៊ុយអេឡា លោក Jorge Arreaza បានប្រាប់ឲ្យមន្រ្តីស្ថានទូតអាមេរិកប្រចាំរដ្ឋធានីការ៉ាកាសត្រូវចាកចេញពីប្រទេសខ្លួនឲ្យអស់ក្នុងរយៈពេល៧២ម៉ោង។
រដ្ឋមន្រ្តីការបរទេសរូបនេះ បានលើកឡើងថា វត្តមានរបស់មន្រ្តីទូតអាមេរិកទាំងនោះលើទឹកដីវេណេស៊ុយឡាមិនមែនជារឿងល្អទេ ដោយថា ពួកគេជាហានិភ័យមួយចំពោះសន្តិភាព សាមគ្គីភាព និងស្ថិរភាព។
ក្នុងបទសម្ភាសន៍ជាមួយអ្នកសារព័ត៌មានកាលពីម្សិលមិញ រដ្ឋមន្រ្តីការបរទេសអាមេរិក លោក Mike Pompeo បញ្ជាក់ថា អាមេរិកបានប្រាប់ដល់មន្រ្តីទូតរបស់ខ្លួននៅវេណេស៊ុយអេឡាឲ្យត្រលប់ចូលប្រទេសវិញហើយ ដើម្បីជៀសវាងគ្រោះថ្នាក់ជាយថាហេតុណាមួយ។ លោក បន្តថាក្រោមការដឹកនាំរបស់លោក ម៉ាឌូរ៉ូ ស្ថានភាពប្រទេសវេណេស៊ុយអេឡាកាន់តែអាក្រក់ទៅៗ។
ប្រទេសវេណេស៊ុយអេឡា បានដាច់ភ្លើងតាំងពីថ្ងៃទី៧ ខែមីនាមកម្ល៉េះ។ ប្រធានាធិបតីវេណេស៊ុយអេឡា លោក ម៉ាឌូរ៉ូ បានចោទថា អាមេរិកជាអ្នកនៅពីក្រោយរឿងនេះ។ មេដឹកនាំវេណេស៊ុយអេឡារូបនេះ ថាអាមេរិកបានប្រើប្រាស់បច្ចេកវិទ្យាតាមអ៊ិនធឺណិត ដើម្បីវាយប្រហារប្រព័ន្ធអគ្គិសនីនៅក្នុងប្រទេសរបស់ខ្លួន។
តាមការចុះផ្សាយរបស់ទីភ្នាក់ងារសារព័ត៌មានរុស្ស៊ី Sputnik News លោក ម៉ាឌូរ៉ូ នឹងស្នើសុំជំនួយពីប្រទេសចិន រុស្ស៊ី គុយបា អ៊ីរ៉ង់ និងអង្គការសហប្រជាតិ ដើម្បីស៊ើបអង្កេតករណីដាច់ភ្លើងក្នុងរយៈពេលជិតមួយសប្តាហ៍មកនេះ៕
