មន្រ្តីជាន់ខ្ពស់វៀតណាម បានស្នើទៅភាគីម៉ាឡេស៊ីឲ្យដោះលែងជនជាតិរបស់ខ្លួនម្នាក់ដែលជាប់សង្ស័យករណីឃាតកម្មលើបងប្រុសម្តាយទីទៃរបស់លោក គីម ជុងអ៊ុន។
រដ្ឋមន្រ្តីក្រសួងការបរទេសវៀតណាម លោក Pham Binh Minh កាលពីម្សិលមិញបានជួបសន្ទនាតាមទូរសព្ទជាមួយរដ្ឋមន្រ្តីការបរទេសម៉ាឡេស៊ី លោក Saifuddin Abdullah ករណីស្រ្តីវៀតណាមម្នាក់ឈ្មោះ Doan Thi Huong ដែលត្រូវបានចាប់ខ្លួនដោយសង្ស័យថាជាប់ពាក់ព័ន្ធនឹងអំពើឃាតកម្មលើលោក គីម ជុងណាម។ នេះ បើតាមការចុះផ្សាយរបស់សារព័ត៌មានវៀតណាម VN Express ។
រដ្ឋមន្រ្តីក្រសួងការបរទេសវៀតណាម បានប្រាប់ទៅភាគីម៉ាឡេស៊ីថា ប្រទេសខ្លួនតាមដានយ៉ាងយកចិត្តទុកដាក់ពីករណីនេះ។ រដ្ឋមន្រ្តីការបរទេសវៀតណាមរូបនេះ ក៏បានស្នើឲ្យម៉ាឡេស៊ីធ្វើការកាត់ក្តីករណីនេះដោយយុត្តិធម៌ ហើយ Doan Thi Huong គួរតែត្រូវបានដោះលែង។
ការស្នើសុំរបស់វៀតណាម ធ្វើឡើងបន្ទាប់ពីតុលាការម៉ាឡេស៊ីកាលពីថ្ងៃទី១១ ខែមីនា ឆ្នាំ២០១៩ បានសម្រេចដោះលែងដោះលែងស្រ្តីជនជាតិឥណ្ឌូនេស៊ីមា្នក់ដែលត្រូវបានសង្ស័យក្នុងករណីឃាតកម្មលោក គីម ជុងណាម ដូចគ្នានេះដែរ។
ស្ត្រីជនជាតិវៀតណាម Doan Thi Huong តែងតែបដិសេធថា ខ្លួនមិនបានជាប់ទាក់ទងនឹងករណីឃាតកម្មទៅលើបងប្រុសរបស់លោក គីម ជុងអ៊ុន ឡើយ។ ស្រ្តីវៀតណាមរូបនេះ បានអះអាងថា នាងត្រូវបានគេបោកបញ្ឆោតឲ្យចូលរួមធ្វើវីដេអូលេងសើចតែប៉ុណ្ណោះ។
លោក គីម ជុងណាម ត្រូវបានឃាតករសម្លាប់នៅព្រលានយន្តហោះទីក្រុងកូឡាឡាំពួរកាលពីថ្ងៃទី១៣ ខែកុម្ភៈ ឆ្នាំ២០១៧ ដោយឃាតករបានប្រើសារពុលម្យ៉ាងឈ្មោះ VX ដែលជាសារធាតុមួយដែលអង្គការសហប្រជាជាតិហាមមិនឲ្យមានការប្រើប្រាស់៕