ចិន បានយល់ព្រមទទួលសំណើរបស់លោក នីកូឡាស ម៉ាឌូរ៉ូ ដែលសុំឲ្យប្រទេសកុម្មុយនីស្តមួយនេះជួយស្វែងរកមូលហេតុនៅពីក្រោយការដាច់ចរន្តអគ្គិសនីនៅវេណេស៊ុយអេឡាក្នុងរយៈជិត១សប្តាហ៍កន្លងមកនេះ។
លោក នីកូឡាស ម៉ាឌូរ៉ូ កាលពីថ្ងៃទី១២ ខែមីនា ឆ្នាំ២០១៩ បានលើកឡើងពីបំណងក្នុងការស្នើសុំជំនួយពីប្រទេសចិន រុស្ស៊ី គុយបា អ៊ីរ៉ង់ និងអង្គការសហប្រជាតិ ដើម្បីស៊ើបអង្កេតករណីដាច់ចរន្តអគ្គិសនីក្នុងប្រទេសរបស់លោក។
អ្នកនាំពាក្យក្រសួងការបរទេសចិន លោក លូខាង បានថ្លែងប្រាប់អ្នកសារព័ត៌មានកាលពីម្សិលមិញ ថាភាគីចិន បានតាមដានយ៉ាងយកចិត្តទុកដាក់ពីបញ្ហាដាច់ចរន្តអគ្គិសនីនៅវេណេស៊ុយអេឡាដែលបង្កជាបញ្ហាលំបាកក្នុងការរកទទួលទាន និងជីវិតរស់នៅប្រចាំថ្ងៃរបស់ពលរដ្ឋប្រទេសនេះ។ លោក ថាតាមរបាយការណ៍នានាបង្ហាញថា ការដាច់ចរន្តអគ្គិសនីនេះកើតឡើងតាមរយៈការវាយប្រហារតាមអ៊ិនធឺណិត។
លោក បន្ថែមថា ចិនក៏មានការព្រួយបារម្ភផងដែរជុំវិញបញ្ហានេះ ហើយសង្ឃឹមថា ភាគីវេណេស៊ុយអេឡាអាចស្តារដំណើរការផ្គត់ផ្គង់អគ្គិសនី ក៏ដូចជារៀបចំសណ្ដាប់ធ្នាប់ក្នុងប្រទេសនេះឲ្យបានឆាប់ឡើងវិញ។ អ្នកនាំពាក្យក្រសួងការបរទេសចិន លោក លូ ខាង ក៏បានបញ្ជាក់ផងដែរថា ភាគីចិនត្រៀមរួចជាស្រេចហើយក្នុងការផ្ដល់ជំនួយ និងការគាំទ្រផ្នែកបច្ចេកទេសដើម្បីជួយឲ្យវេណេស៊ុយអេឡាមានអគ្គិសនីប្រើប្រាស់ឡើងវិញ។ ប៉ុន្តែ បើតាមអ្នកនាំពាក្យរូបនេះ ចិនមិនទាន់អាចបញ្ជាក់បានទេពីពេលវេលាដែលត្រូវបញ្ជូនមន្រ្តីបច្ចេកទេសទៅជួយវេណេស៊ុយអេឡា។
ទោះយ៉ាងណាក៏ដោយ កាលពីម្សិលមិញ រដ្ឋមន្រ្តីក្រសួងព័ត៌មាននៃប្រទេសវេណេស៊ុយអេឡា លោក Jorge Rodriguez បានបញ្ជាក់ក្នុងសន្និសីទសារព័ត៌មានមួយកាលពីម្សិលមិញ ថារដ្ឋាភិបាលរបស់លោក ម៉ាឌូរ៉ូ បានស្តារប្រព័ន្ធអគ្គិសនីបានទាំងស្រុងឡើងវិញហើយ។
ប៉ុន្តែអ្នកយកព័ត៌មានទូរទស្សន៍ CNN ដែលកំពុងតាមដានបញ្ហានេះ បានលើកឡើងថា ការដាច់ចរន្តអគ្គិសនីនៅតែបន្តកើតឡើងនៅតំបន់ខ្លះនៃរដ្ឋធានីការ៉ាកាស។ វេជ្ជបណ្ឌិតដែលធ្វើការនៅអង្គការមនុស្សធម៌មួយ បានប្រាប់អ្នកសារព័ត៌មាន CNN ថា អគ្គិសនីនៅតាមមន្ទីរពេទ្យមួយចំនួននៅតែមិនទាន់មាននៅឡើយ។
ការដាច់ចរន្តអគ្គិសនីក្នុងរយៈពេលជិតមួយសប្តាហ៍មកនេះ បានប៉ះពាល់យ៉ាងខ្លាំងដល់ប្រជាជនក្នុងប្រទេសអាមេរិកឡាទីនមួយនេះ។ ប្រជាជនក្នុងរដ្ឋ១៩ក្នុងចំណោមរដ្ឋទាំង២៣ ត្រូវរស់នៅដោយគ្មានអគ្គិសនីប្រើប្រាស់ សាលារៀន និងកន្លែងធ្វើការមួយចំនួនធំត្រួវផ្អាកដំណើរការ។ ក្រុមពលរដ្ឋដែលពឹងផ្អែកលើម៉ូទ័របូមទឹកដែលប្រើអគ្គិសនី ត្រូវបង្ខំចិត្តយកទឹកកខ្វក់ចេញពីប្រលាយ និងទឹកហូរតាមទន្លេទៅប្រើប្រាស់។
ក្រៅពីនេះ ហាងទំនិញជាច្រើនត្រូវបានចោរចូលគាស់លួចយកឥវ៉ាន់។ មិនត្រឹមតែប៉ុណ្ណោះ ការបំផ្លិចបំផ្លាញទ្រព្យសម្បត្ដិសារធារណៈក៏កើតមាននៅច្រើនកន្លែងផងដែរ។
ប្រទេសវេណេស៊ុយអេឡា បានដាច់ចរន្តអគ្គិសនីតាំងពីថ្ងៃទី៧ ខែមីនាមកម្ល៉េះ។ លោក ម៉ាឌូរ៉ូ បានចោទថា អាមេរិកជាអ្នកនៅពីក្រោយរឿងនេះ។ មេដឹកនាំវេណេស៊ុយអេឡារូបនេះ ថា អាមេរិកបានប្រើប្រាស់បច្ចេកវិទ្យាតាមអ៊ិនធឺណិត ដើម្បីវាយប្រហារប្រព័ន្ធអគ្គិសនីនៅក្នុងប្រទេសរបស់ខ្លួន។
មិនត្រឹមតែប៉ុណ្ណោះរដ្ឋាភិបាល លោក ម៉ាឌូរ៉ូ បានឆ្លើយតបយ៉ាងចាស់ដៃជាមួយអាមេរិក ដោយកាលពីថ្ងៃ១២ ខែមីនា ឆ្នាំ២០១៨ រដ្ឋមន្រ្តីការបរទេសវេណេស៊ុយអេឡា បានប្រកាសឲ្យមន្រ្តីស្ថានទូតអាមេរិកប្រចាំរដ្ឋធានីការ៉ាកាសត្រូវចាកចេញពីប្រទេសខ្លួនឲ្យអស់ក្នុងរយៈពេល៧២ម៉ោង៕
